बाँके, साउन ५ गते ।
नेपाल–भारत सीमा जोड्ने पश्चिम नेपालको प्रमुख व्यापारिक नाका जमुनाहा यतिबेला अव्यवस्था बनेको छ। सीमावर्ती क्षेत्रमा सञ्चालित क्यासिनोहरूले आफ्ना सवारी साधन मुख्य सडकमै जथाभाबी पार्किङ गर्न थालेपछि दैनिक हजारौँ यात्रु, बिरामी, सर्वसाधारण र सवारी चालकहरू घण्टौँसम्म सास्ती व्यहोर्न बाध्य छन्।
भारतसँगको अत्यन्त संवेदनशील सीमा नाकाको मुख्य सडक नै क्यासिनोका विलासी गाडी र ई–रिक्साले ओगट्ने गरेको दृश्य अहिले सामान्यजस्तै बनेको छ। पार्किङका लागि छुट्टै व्यवस्था नगरी सडकलाई नै निजी पार्किङस्थल बनाइँदा आवागमन प्रभावित भएको छ भने पैदलयात्रीले समेत जोखिम मोलेर यात्रा गर्नुपर्ने अवस्था सिर्जना भएको छ।
सबैभन्दा गम्भीर प्रश्न भनेको–यो सबै भइरहेको स्थान इलाका प्रहरी कार्यालय जमुनाहाकै अगाडि हो । कानुन कार्यान्वयनको जिम्मेवारी बोकेको प्रहरी कार्यालयको आँखै अगाडि सडक मिचेर गाडी पार्क गरिँदा पनि कुनै प्रभावकारी हस्तक्षेप नदेखिनुले स्थानीयवासीमा अनेक आशंका जन्माएको छ। ’आफ्नै कार्यालयअगाडि सडक ठप्प हुने गरी गाडी पार्क गरिन्छ, तर हटाउने कुनै प्रयास हुँदैन एक स्थानीय व्यवसायीले आक्रोश व्यक्त गर्दै भने,–’पहुँचवाला क्यासिनो सञ्चालकहरूका कारण प्रहरी प्रशासन निरीह बनेको हो कि भन्ने अनुभूति हुन्छ।’ स्थानीयका अनुसार यो समस्या कुनै एक–दुई दिनको होइन। लामो समयदेखि दोहोरिँदै आएको अव्यवस्थाप्रति पटक–पटक गुनासो गरिए पनि सम्बन्धित निकायबाट ठोस पहल हुन सकेको छैन। जसका कारण सीमा क्षेत्रको ट्राफिक व्यवस्थापन झन् अस्तव्यस्त बन्दै गएको छ।
सीमा नाका जस्तो संवेदनशील स्थानमा यस्तो लापरबाही भइरहँदा नेपालगन्ज उपमहानगरपालिका, जिल्ला प्रशासन कार्यालय बाँके र जिल्ला प्रहरी कार्यालयको भूमिकामाथि पनि प्रश्न उठ्न थालेको छ। सडक सार्वजनिक सम्पत्ति भए पनि प्रभावशाली व्यवसायको दबाबमा प्रशासन निरीह बनेको हो कि भन्ने जनगुनासो बढ्दो छ। कानुन सबैका लागि समान हुने राज्यको मूल सिद्धान्त हो। तर जमुनाहा नाकामा देखिएको अवस्थाले भने प्रभावशाली व्यवसायीका लागि एउटा नियम र सर्वसाधारणका लागि अर्को नियम लागू भएको जस्तो अनुभूति गराएको स्थानीयहरूको भनाइ छ।
स्थानीयवासीले सीमा क्षेत्रको अवैध पार्किङ तत्काल हटाई सडकलाई निर्वाध बनाउन, ट्राफिक व्यवस्थापन प्रभावकारी बनाउन तथा दोषीमाथि कानुनी कारबाही गर्न सम्बन्धित निकायसँग माग गरेका छन्। उनीहरूको भनाइमा, यदि अहिले पनि प्रशासन मौन बस्ने हो भने जमुनाहा नाकाको अव्यवस्था अझ गम्भीर बन्नेछ र कानुन कार्यान्वयन गर्ने निकायप्रतिको जनविश्वास थप कमजोर हुनेछ।
हाल इलाका प्रहरी कार्यालय जमुनाहाको नेतृत्व प्रहरी निरीक्षक राजन भट्टराईले गरिरहेका छन्।
Discussion about this post