बाँके, सायन ६ गते ।
जिल्ला प्रशासन कार्यालय बाँकेले राष्ट्रिय परिचयपत्र सम्बन्धी सेवा सार्वजनिक बिदाका दिन पनि सञ्चालन गर्ने भएको छ।
कार्यालयमा पछिल्ला केही दिनयता राष्ट्रिय परिचयपत्र विवरण दर्ता गराउने सेवाग्राहीको चाप बढेपछि आगामी साउन ९ र १० गते (शनिबार र आइतबार) पनि सेवा सञ्चालन गर्न लागिएको हो।
सहायक प्रमुख जिल्ला अधिकारी पूर्ण बहादुर खत्रीका अनुसार सेवाग्राहीलाई सहज रूपमा सेवा उपलब्ध गराउने उद्देश्यले सार्वजनिक बिदाका दिन पनि बिहान १० बजेदेखि अपराह्न ४ बजेसम्म राष्ट्रिय परिचयपत्र सम्बन्धी सेवा प्रदान गरिनेछ।
“पछिल्लो समय राष्ट्रिय परिचयपत्र विवरण दर्ता गराउने सेवाग्राहीको संख्या उल्लेख्य रूपमा बढेको छ,“ खत्रीले भने, “सेवा प्रवाहलाई सहज बनाउन सार्वजनिक बिदाका दिन पनि कार्यालय खुला राखेर सेवा दिने व्यवस्था मिलाएका छौं।“
उनले राष्ट्रिय परिचयपत्र सम्बन्धी सेवा लिन चाहने सेवाग्राहीलाई तोकिएको समयमा कार्यालयमा उपस्थित भई सेवा लिन आग्रह गरेका छन्।
Discussion about this post