बाँके, साउन ५ गते ।
नेपाल–भारत सीमा नाका रुपैडिहामा लागूऔषध ब्राउन सुगरसहित एक भारतीय नागरिक पक्राउ परेका छन्।
रुपैडिहा प्रहरीले सोमबार राति करिब ९ बजे नेपालतर्फ जाँदै गरेका ४३ वर्षीय मोहम्मद इमरान खानलाई ३५ ग्राम ब्राउन सुगरसहित पक्राउ गरेको हो। उनी भारतको उत्तर प्रदेशस्थित बहराइच जिल्लाको कोतवाली नगर क्षेत्रका बासिन्दा हुन्।
रुपैडिहा प्रहरी चौकीका प्रभारी निरीक्षक हरेंद्र कुमार मिश्रका अनुसार सीमा स्तम्भ नम्बर ६५१÷११ नजिक नियमित गस्तीका क्रममा रेलवे रोड हुँदै नेपालतर्फ जाँदै गरेको भारतीय नम्बर प्लेटको मोटरसाइकललाई रोकेर जाँच गरिएको थियो।
प्रहरीका अनुसार जाँचका क्रममा इमरानले आफू पत्रकार भएको दाबी गर्दै प्रेस परिचयपत्र देखाएका थिए। तर रातिको समयमा वैकल्पिक मार्ग हुँदै नेपाल प्रवेश गर्न खोजेकाले शंका लागेर खानतलासी गर्दा उनको पाइन्टको खल्तीबाट ३५ ग्राम ब्राउन सुगर बरामद भएको प्रहरीले जनाएको छ।
उनको साथबाट आधार कार्ड, प्रेस परिचयपत्र, एक मोबाइल फोन र २०० भारतीय रुपैयाँ पनि बरामद भएको छ। प्रहरीले मोटरसाइकलसमेत नियन्त्रणमा लिएको छ।
प्रहरीले पक्राउ परेका इमरानविरुद्ध भारतको लागूऔषध नियन्त्रणसम्बन्धी एनडीपीएस ऐन अन्तर्गत मुद्दा दर्ता गरी बहराइच अदालतमा पेश गरेको जनाएको छ।
सीमामा लागूऔषध ओसारपसार बढ्दो चिन्ता
पछिल्ला केही महिनायता रुपैडिहा–नेपाल सीमा क्षेत्रमा ब्राउन सुगर तथा अन्य लागूऔषध बरामद हुने घटनाहरू निरन्तर बढिरहेका छन्। यसले सीमावर्ती क्षेत्र लागूऔषध ओसारपसारको संवेदनशील मार्ग बन्दै गएको संकेत गरेको छ।
स्थानीय स्रोतका अनुसार बाहिरी रूपमा अन्य व्यवसाय सञ्चालन गर्ने केही व्यक्तिहरू लागूऔषध कारोबारमा समेत संलग्न रहेको आशंका गरिए पनि मुख्य गिरोहसम्म सुरक्षा निकायको पहुँच अझै पुग्न सकेको छैन। यसअघि पनि यस्ता गतिविधिमा संलग्न केही व्यक्तिहरू पक्राउ परेर जेल सजाय भोगिसकेका छन्।
Discussion about this post