बाँके, साउन १३ गते ।
बाँकेको कोहलपुर नगरपालिका–३ शान्तिटोलमा निर्माणाधीन सेफ्टी ट्याङ्कीभित्र निसास्सिँदा तीन जना मजदुरको मृत्यु भएको छ।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतितसिंह राठौरका अनुसार दयाप्रसाद थारुको निर्माणाधीन घरको आँगनमा बनाइँदै गरेको सेफ्टी ट्याङ्कीभित्र काम गर्ने क्रममा बुधबार बिहान तीन जना मजदुर फसेका थिए।
मृत्यु हुनेमा कालु थारु, प्रकाश थारु र बिर्जा थारु रहेका छन्। उनीहरू सेफ्टी ट्याङ्कीभित्र काम गरिरहेका बेला निसास्सिएको प्रारम्भिक अनुमान प्रहरीले गरेको छ।
घटनाको जानकारी प्राप्त हुनासाथ इलाका प्रहरी कार्यालय कोहलपुरका प्रमुख प्रहरी नायब उपरीक्षक चक्र डम्मरपालको नेतृत्वमा १५ सदस्यीय प्रहरी टोली घटनास्थल पुगेको थियो। उद्धारका लागि जेसीबीको सहायताले सेफ्टी ट्याङ्कीको माथिल्लो भाग भत्काएर बिहान करिब १० बजे तीनै जनालाई बाहिर निकालिएको थियो। प्रहरीले उनीहरूलाई घटनास्थलमै मृत अवस्थामा फेला पारेको जनाएको छ।
मृतकहरूको शव पोस्टमार्टमका लागि भेरी अस्पताल, नेपालगञ्ज पठाइएको छ। सेफ्टी ट्याङ्कीभित्र विषालु ग्यासका कारण उनीहरूको ज्यान गएको हुन सक्ने प्रारम्भिक अनुमान गरिएको प्रहरीले जनाएको छ। घटनाको विस्तृत कारण खुल्न बाँकी रहेको र थप अनुसन्धान भइरहेको इलाका प्रहरी कार्यालय कोहलपुरले जनाएको छ।
Discussion about this post