बाँके साउन १७ गते ।
बाँकेको नेपालगन्ज उपमहानगरपालिका–१९, कटलियाबाट प्रहरीले ३८ ग्राम ७५० मिलिग्राम ब्राउन सुगरजस्तो देखिने पदार्थसहित एक दम्पतीलाई पक्राउ गरेको छ।
पक्राउ पर्नेमा कटलिया निवासी ३० वर्षीय सुरेश बर्मा र उनकी २४ वर्षीया श्रीमती अनिता बर्मा रहेका छन्।
जिल्ला प्रहरी कार्यालय बाँकेका सूचना अधिकारी प्रहरी नायब उपरीक्षक प्रतीत सिंह राठौरका अनुसार लागूऔषध कारोबार भइरहेको विशेष सूचनाका आधारमा लागूऔषध नियन्त्रण ब्युरो शाखा कार्यालय नेपालगन्ज र जिल्ला प्रहरी कार्यालय बाँकेबाट खटिएको प्रहरी टोलीले बर्माको घरमा खानतलासी गरेको थियो।
खानतलासीका क्रममा सुरेशको साथबाट ३७ ग्राम ५५० मिलिग्राम र अनिताको साथबाट १ ग्राम २०० मिलिग्राम गरी जम्मा ३८ ग्राम ७५० मिलिग्राम ब्राउन सुगरजस्तो देखिने पदार्थ बरामद भएको राठौरले बताए।
प्रहरीले उनीहरूलाई लागूऔषधसम्बन्धी कसुरमा पक्राउ गरी बाँके जिल्ला अदालतबाट १० दिनको म्याद थप गरेको छ। घटनाबारे थप अनुसन्धान भइरहेको राठौरले बताए।
प्रहरीका अनुसार उनीहरूको साथबाट युपी ४० बीपीओ २५७ नम्बरको पल्सर मोटरसाइकल र ओप्पो कम्पनीको एक थान मोबाइल फोन समेत बरामद भएको छ।
Discussion about this post