दाङ, भदौ ३० गते ।
दाङ प्रहरीले जिल्लाका विभिन्न स्थानमा लुकाइछिपाइ राखिएका आठ नाल भरुवा बन्दुक बरामद गरेको छ।
जंगल तथा झाडीमा भरुवा बन्दुक लुकाइराखिएको गोप्य सूचना पाएपछि जिल्ला प्रहरी कार्यालय दाङ र मातहतका प्रहरी टोलीले मंगलबार बिहान विशेष अप्रेसन चलाएका थिए। बिहान ६ बजेदेखि ११ बजेसम्म गरिएको अप्रेसनका क्रममा आठ नाल भरुवा बन्दुक बरामद भएको जिल्ला प्रहरी कार्यालय दाङका सूचना अधिकारी एवं प्रहरी नायव उपरीक्षक डा. हेमबहादुर केसीले जानकारी दिए।
उनका अनुसार इलाका प्रहरी कार्यालय भैंसाहीबाट खटिएको टोलीले राजपुर गाउँपालिका–७ भैंसाहीस्थित भैंसाही खोलाको किनारनजिकै झाडीमा लुकाइराखेको एक नाल भरुवा बन्दुक बरामद गरेको हो।
त्यस्तै, इलाका प्रहरी कार्यालय कमिरेचौरको टोलीले बंगलाचुली गाउँपालिका–८ दुलेभिरस्थित सामुदायिक वनको झाडीबाट दुई नाल र प्रहरी चौकी गोलटाकुरीको टोलीले दंगीशरण गाउँपालिका–९ बुर्कासालस्थित झाडीबाट दुई नाल भरुवा बन्दुक बरामद गरेको प्रहरीले जनाएको छ।
प्रहरी चौकी चिराघाटको टोलीले शान्तिनगर गाउँपालिका–३ स्थित सिर्जना सामुदायिक वनबाट एक नाल तथा अस्थायी प्रहरी पोष्ट रिहारको टोलीले लमही नगरपालिका–९ स्थित आमबासौली सामुदायिक वनको झाडीबाट दुई नाल भरुवा बन्दुक बरामद गरेको हो।
बरामद भएका भरुवा बन्दुक कसले र कुन प्रयोजनका लागि लुकाएर राखेको भन्ने विषयमा प्रहरीले थप अनुसन्धान गरिरहेको जनाएको छ।
Discussion about this post