बाँके, भदौ ३० गते ।
जनता समाजवादी पार्टी, नेपालले रसुवागढी र भोटेकोशी क्षेत्रमा आएको बाढीबाट प्रभावित नागरिकको उद्धार, राहत तथा पुनःस्थापनाका लागि प्रधानमन्त्री राहत कोषमा २१ लाख रुपैयाँ सहयोग गरेको छ।
जसपाकी केन्द्रीय कार्यकारिणी समिती सदस्य अम्बिका काफ्लेले पार्टीको केन्द्रीय कार्यकारिणी समितिको निर्णयअनुसार उक्त रकम प्रधानमन्त्री राहत कोषमा सहयोग गरिएको बताइन्।
उनका अनुसार पार्टीका महासचिवद्वय प्रकाश अधिकारी र डा. सुरेन्द्रकुमार झासहितको प्रतिनिधिमण्डलले अर्थमन्त्री डा. स्वर्णिम वाग्लेलाई भेटेर २१ लाख रुपैयाँको चेक हस्तान्तरण गरेको हो।
‘विपद्मा परेका नागरिकलाई राहत र पुनःस्थापनामा सहयोग पुगोस् भनेर पार्टीले प्रधानमन्त्री राहत कोषमा रकम दिएको हो,’ उनले भनिन्, ‘विपद्को समयमा प्रभावित नागरिकको साथमा उभिनु सबैको साझा जिम्मेवारी हो।’
पार्टीले सञ्चालन गरेको राहत संकलन अभियानमा विभिन्न तहका समिति तथा सहयोगीबाट सहयोग जुटिरहेको पनि उनले बताइन्। मानवीय सेवाको अभियानमा सहयोग गर्ने सबैप्रति उनले धन्यवाद व्यक्त गरिन्।
जसपाका महासचिव डा. सुरेन्द्रकुमार झाले बाढीबाट प्रभावित नागरिकको उद्धार, राहत तथा पुनःस्थापना गर्नु सबैको साझा दायित्व भएको बताएका छन्।
प्रेस विज्ञप्तिमार्फत झाले विपद्को यस घडीमा जनता समाजवादी पार्टी प्रभावित नागरिकको साथमा रहेको जनाउँदै नेपाल सरकारले सञ्चालन गरिरहेको उद्धार, राहत तथा पुनःस्थापनाको अभियानलाई पार्टीले समर्थन गर्ने बताएका हुन्।
जसपाले देश–विदेशमा रहेका नेपाली तथा दातृ निकायलाई पनि विपद् प्रभावित नागरिकको उद्धार, राहत तथा पुनःस्थापनाका लागि सञ्चालित अभियानमा सहभागी हुन अपिल गरेको छ।
जसपाका अनुसार भदौ १६, १७ र १८ गते बसेको केन्द्रीय कार्यकारिणी समितिको बैठकले विपद् प्रभावित नागरिकका लागि आर्थिक सहयोग गर्ने निर्णय गरेको थियो। सोही निर्णयअनुसार प्रधानमन्त्री राहत कोषमा २१ लाख रुपैयाँ हस्तान्तरण गरिएको हो।
चेक हस्तान्तरण गर्न गएको प्रतिनिधिमण्डलमा विपद् व्यवस्थापन तथा राहत आर्थिक सहयोग संकलन समितिका संयोजक तथा पार्टीका सचिव शैलेन्द्रप्रसाद साह, वीरेन्द्र प्रधान, रमेशबाबु श्रेष्ठ, पेशल ढकाल र भुवनेश्वर चौधरी सहभागी थिए।
Discussion about this post