सुर्खेत मंंसिर १३ गते ।
मानविकी र सामाजिक विज्ञानका बारेमा नबुझेसम्म समाज र देशका बारेमा बुझ्न नसकिने एक कार्यक्रमका सहभागीहरुले बताएका छन् ।
मध्यपश्चिमाञ्चल विश्वविद्यालयमा मानविकी तथा समाजशास्त्र संकाय डीन कार्यालयले आयोजना गरेको ‘उच्च शिक्षामा मानविकी र सामाजिकशास्त्र अध्ययनको महत्व’ विषयक अन्तक्र्रिया कार्यक्रमका सहभागीहरुले मानिसको चेतनाका लागि र समाज निर्माण गर्नका लागि सामाजिक विज्ञानको अध्ययन आवश्यक पर्ने बताएका हुन् ।
मानव र समाजको विकासमा भूमिका खेल्ने एउटामात्र संकाय मानविकी र सामाजिकशास्त्र भएकाले यसको महत्व झल्काउने उद्देश्यले कार्यक्रमको आयोजना गरिएको सहायक डीन कमलेश डिसीले बताए ।
उच्च शिक्षामा मानविकी र सामाजिकशास्त्र अध्ययनको महत्वका विषयमा अवधारणापत्र प्रस्तुत गर्दै मानविकी र सामाजिकशास्त्र संकायका पूर्वडीन पीताम्बर ढकालले विश्वविद्यालय नेपाल सरकारको लगानीमा सञ्चालन हुने भएकाले विद्यार्थीबाट चर्को शुल्क उठाउन नहुने बताए । साथै उनले समयसापेक्ष विश्वविद्यालयका ऐन नियमलाई परिमार्जन गर्दै व्यवहारिक शिक्षा प्रदानमा जोड दिनुपर्ने बताए ।
यदि समाजबाट राजनीतिशास्त्र, मानवशास्त्र, समाजशास्त्र, पत्रकारिता, द्वन्द्व, र सामाजिक कार्यजस्ता विषयलाई हटाइदिने हो भने समाजलाई बुझ्न नसकिने भन्दै ढकालले मानविकी र सामाजिकशास्त्रमा समस्याहरुलाई समाधान गर्दै यसको महत्वका बारेमा बुझाउन सकेमा विद्यार्थीको संख्या वृद्धि हुने बताए ।
विश्वविद्यालयका अन्य संकायजस्तै मानविकी र सामाजिकशात्र संकायलाई पनि एउटै नजरबाट हेरिनुपर्ने बताउँदै पूर्वडिन ढकालले अध्ययन गरिने विषयलाई सकेसम्म लचिलो र व्यवहारिक बनाउँदै लैजानुपर्नेमा जोड दिए ।
एल क्याम्पसका निर्देशक डा. अर्जुन ऐडीले समाजलाई खुल्ला अर्थतन्त्रसँग मात्र जोडेकाले सामाजिक शात्रमा विद्यार्थीको आकर्षण घटेको हुनसक्ने बताए । उनले जागिरका लागि मात्र नभई मानिसको चेतनाको विकास र समाजको विकासका लागि मानविकी र सामाजिक विषयको अध्ययन आवश्यक भएको दाबी गरे । तार्किक क्षमताको विकासका लागि समाजको अध्ययन निकै महत्वपूर्ण भएको उल्लेख गर्दै डा. ऐडीले चेतनाको विकास भएमा मानिसले जुनसकै क्षेत्रको काम पनि सहजै गर्न सक्ने बताए ।
मप विश्वविद्यालय योजना विकास र मूल्यांकन निर्देशनालयका निर्देशक प्रा.डा. हिरण्यप्रसाद गौतमले बजारको माग अनुसार पाठ्यक्रमलाई परिमार्जन गर्न सकेमा विद्यार्थीको आकर्षण बढ्न सक्ने बताए । यसैगरी विज्ञान तथा प्रविधि संकायका डीन प्रा.डा. देवबहादुर रानाले राष्ट्रिय नीति अनुसार पाठ्यक्रमलाई संशोधन गर्दै विद्यार्थीलाई व्यवहारिक शिक्षा दिनुपर्नेमा जोड दिए ।
पछिल्लो समयमा मानविकी र समाजशास्त्र संकायमा विद्यार्थीको चाप घट्दै गएकाले यसको कारण पत्ता लगाई समाजको माग र बजारलाई मध्यनजर गर्दै पाठ्यक्रम निर्माण गरेर गरिने मानविकी तथा सामाजिक शात्र संकायका डीन प्रा. खोपिराम लम्सालले बताए ।
कार्यक्रममा मानविकी तथा सामाजिकशास्त्र संकायका क्याम्पस प्रमुख तेजविक्रम बस्नेत, सहायक क्याम्पस प्रमुख ललितजङ्ग शाही, उपप्राध्यापक र विद्यार्थीहरुको उपस्थिति रहेको थियो ।
Discussion about this post