बाँके पुस ४ गते ।
नेपालको पश्चिम क्षेत्र पर्यटकीय दृष्टिकोणले अत्यन्तै महत्वपूर्ण र सौन्दर्य गन्तव्य भएको ठाउँका रुपमा चिनिन्छ । तर, घुम्न आउने सबै पर्यटक पश्चिम पुग्न सक्दैनन् । काठमाडौं, पोखरा र चितवन घुमेपछि उनीहरु आफ्नो देश फर्किन्छन् । कारण हवाई भाडा विदेशी र नेपालीलाई अन्तर छ । यही भाडामा फरक भएपछि महंगो भाडातिरेर पश्चिमसम्म घुम्न आउने विदेशी पर्यटकको संख्या कम भएको पर्यटन व्यवसायीहरुको गुनासो छ । पश्चिम नेपालका विभिन्न गन्तव्य मध्य बर्दियाको ठाकुरद्वारा पनि एउटा महत्वपूर्ण गन्तव्य हो । यहाँका पर्यटन व्यवसायीहरुले पनि संसारमै कही नभएको भाडा दरका कारण पर्यटक बर्दियासम्म पुग्न नसकेको प्रतिक्रिया दिएका छन् । पर्यटन व्यवसायी मोहन थारु अन्तर्राष्ट्रिय क्षेत्रमा स्थापित विश्वका १०० गन्तव्यमा पर्न सफल बर्दियाको ठाकुरद्वारामा आउने पर्यटकका लागि एक मात्र बाधक भाडामा असमानता भएको बताउँछन् । उनले नेपाल भ्रमण वर्ष मनाउने सन्दर्भमा बर्दिया ठाकुरद्वाराका पर्यटन व्यवसायीले छुटको व्यवस्थासहित अगाडि बढेको खण्डमा सरकारले भाडामा समायोजन गर्न नीतिगतरुपमै निर्णय लिनु पर्ने माग गरे
पश्चिम नेपालका पर्यटन व्यवसायीहरुले पहिलेदेखि नै असमान भाडादर हटाई पर्यटन प्रवद्र्धनमा जोड दिँदै आए पनि नेपाली र विदेशीलाई फरक भाडादर अहिले पनि कायम रहँदा नेपाल भ्रमण वर्षको अवसर पारेर यसको निर्णण हुनु पर्ने माग पर्यटन व्यवसायीहरुको छ । बर्दिया ठाकुरद्वाराका अर्का पर्यटन व्यवसायी धर्मराज घिमिरे पर्यटकका लागि आकर्षण बर्दियाको ठाकुरद्वारा लगायत पश्चिम क्षेत्रमा पर्यटक आउन चाहँदा चाहदै पनि असमान भाडाका कारण आउन नसकेको बताउँदै भाडा समायोजनमा जोड दिन्छन् ।
राजधानी काठामाडौं भन्दा टाढा रहेका पर्यटकीय गन्तव्यमा पुग्न अन्य विभिन्न कारण मध्य सबैभन्दा ठूलो कारण विदेशीलाई लिइने भाडा महंगो भएको व्यवसायीहरुको ठहर छ । नेपाल बाहेक संसारका कुनै पनि देशमा भाडामा फरक नभएको व्यवसायीहरुले बताउँदै आएका छन् ।
Discussion about this post