रजनी योगी बाँके १३, पुष ।
रेडियो श्रोता समुहमा उठेका केही सवाल जुन स्थानीय तह र जिल्लामा पनि समाधान हुन सकेका छैनन् त्यस्ता सवाल प्रदेश सभा सांसद् द्वारा प्रदेश सरकार समक्ष पुराउन अनुरोध गर्दै साझा आयोजना गरिएको छ। पारस्परिक जवाफदेहिता परियोजना अन्तर्गत सुचना र मानव अधिकार अनुसन्धान केन्द्रले कार्यक्रम आयोजना गरिएको हो।
प्रदेश सांसद् सुरेन्द्र हमालको प्रमुख आतिथ्यतामा आयोजित कार्यक्रममा सुचना र मानव अधिकार अनुसन्धान केन्द्रका अध्यक्ष विश्वजित तिवारीले स्वागत मन्तव्य राख्दै जनतालाई सार्वभौम सत्ता सम्पन्न भनिएको छ तर पनि स्थानीय तहबाट पाउने सेवा सुबिधा लिन दिनानुदिन धाउदा पनि सुबिधा पाउन मुस्किल हुने गुनासो पाउने गरेको बताउनु भयो। यसैगरी डुडुवा गाउँपालिकाका काल्देव बस्खोरले आमाको नामबाट नागरिकता लिन खोज्दा अदालतमा मुद्दा दिनु पर्यो र मुद्दा जित्नु भयो, अदालतले आदेश पनि दियो तर प्रमुख जिल्ला अधिकारीले सुनुवाई नगरेको बताउनु भयो। डुडुवाकै भवानी बोहोराले भन्नुभयो जिल्लाबाट गरिमा नामको धान बितरण गर्यो तर धानको एउटा दाना लागेन काटेर गाईवस्तुलाई खुवाउन बाहेक बिकल्प भएन । यस्तै डुडुवा वडा नं ५ का सुर्यलाल यादव राप्ती नदिको कटान र पटानले बर्सेनि घाटा सहनु परेको छ तर स्थानीय तहले अहिलेसम्म केही पहल समेत नगरेको गुनासो राख्नुभयो ।
साझा सभामा विशेष गरि डुडुवा गाउँपालिका वडा नं ४ मा रहेको डिस्टिलरीले पारेको प्रभाव, फौजी किराले बालिमा पारेको प्रभाव र डुडुवा गाउँपालिकामा कृषि नीति नहुँदा भएको समस्या रेडियो श्रोता समुहद्वारा प्रदेश सांसद्सामु समस्या राखिएको छ ।
प्रदेश सांसद् माननीय सुरेन्द्र हमालले सम्पुर्ण समस्यालाई सम्बोधन गर्दै कतिपय सवालमा आफू परिचित भएको र कतिपय सवालमा परिचित नभएको भन्दै ती समस्यालाई आफ्नै समस्या सम्झेर कुन तहले ती समस्याको समाधान गर्छ त्यहीँसम्म पुर्याईदिने प्रतिबद्धता व्यक्त गर्नुभयो।
स्थानीय स्तरमा उठेका सवाल जुन स्थानीय तह र जिल्लामा समाधान हुन सकेका छैनन् त्यस्ता सवाल संघ वा प्रदेशमा पुर्याउनु साझा सभाको उधेश्य हो । कार्यक्रममा डुडुवा गाउँपालिका वडा नं ४ स्थानीय सभाका सदस्य हरि रेउले र वडा नं ५ स्थानीय सभाका अध्यक्ष भागरथी चन्द लगायत स्थानीय नागरिक, अधिकारकर्मी,पत्रकार र बाँके डुडुवा गाउँपालिका शिव, अम्रहवा र छग्रहवा रेडियो श्रोता समुहका सदस्यहरुको सहभागीता रहेको थियो।
Discussion about this post