डोटी माघ ५ गते । डोटीमा पुस २६ गते देखि सुरु भएको छाउपडी गोठ भत्काउने अभियानले तिब्रता पाए संगै शनिबार सम्म अठासी वटा छाउपडी गोठ भत्काईएका छन् ।
बडीकेदार गाउँपालिकाको वडा नम्बर ३ सिन्दुरेपानी बाट सुरु भएको अभियानले सोही गाउँपालिकाको विभिन्न वडाहरुमा रहेका ७१ वटा गोठहरु भत्काईएका छन् । त्यसै गरि जिल्लाका अन्य स्थानिय तह जोरायल गाउँपालिकामा ३ वटा र पुर्विचौकी गाउँपालिकामा १४ वटा छाउगोठ भत्काईएको जिल्ला प्रहरी कार्यालय डोटीका प्रहरी उपरिक्षक दिलीप सिं देउवाले जानकारी दिए ।
गृह मन्त्रालयले पुस ९ गते प्रमुख जिल्ला अधिकारीलाई छाउपडी नियन्त्रण गर्न निर्देशन पत्र पठाएपछि गोठ भत्काउन प्रहरी टोलीलाई पनि परिचालन गरिएको हो । प्रहरी उपरिक्षक देउवाले भने ‘डोटीमा जति गोठ भत्काइए प्रहरी प्रशासनले जबरजस्ती रुपमा नभई स्थानिय सरकारसंग समन्वय गरि स्थानियलाई सम्झाई बुझाई गरि उनिहरुकै सहभागिता, सहयोग र रोहबरमा भत्काईएको हो स्थानियले पूर्ण रुपमा सहयोग गरिरहेका छन्’ जिल्लामा तिब्र रुपमा संचालन भइरहेको गोठ भत्काउने अभियानलाई सबैले सहयोग गर्नुपर्ने समेत प्रहरी उपरिक्षक देउवाले बताए ।
गोठ भत्काउने अभियानमा स्थानीय बासीन्दा, जनप्रतिनिधि, प्रहरी प्रशासन, महिला संजालको सहभागिता रहेको छ । जिल्लामा रहेका छाउगोठ भत्काउने अभियान सफल पार्न स्थानीय तहसंग समन्वय सहकार्य गर्नुका साथै आवश्यक मात्रामा सुरक्षाकर्मी परिचालन गरिएको डोटीका प्रमुख जिल्ला अधिकारी टेक नारायण पौडेलले पौडेलले बताए । उनल भने ‘छाउगोठ कहाँ कति छन भनेर सूचना लिएर भत्काउन स्थानियको रोहबरमा प्रहरी खटाएका छौँ अब छाउगोठ बनाउन पाईन्न् ।’ डोटीलाई छाउपडी गोठमुक्त जिल्ला घोषणा गर्ने गरी गोठ भत्काउने अभियानलाई तीव्र पारिएको समेत प्रजिअ पौडेलले बताए ।
सुदूरपश्चिममा महिला रजस्वला भएको समयमा अथार्त छाउ भएकी महिलालाई घरमा राखे अनिष्ट हुन्छ र देबी देउता रिसाउछन भन्ने अन्ध विश्वासका साथ महिनावारी अर्थात छाउ भएकी महिलाका लागि पाँच दिनसम्म घरभन्दा बाहिर बस्नको लागि छुट्टै कटेरो बनाउने चलन रहेको छ त्यहीं कटेरो वा गोठलाई छाउपडी गोठ भनिन्छ ।
मुलुकी अपराध संहिता २०७४ को दफा १६८ को उपदफा ३ अनुसार महिलाहरु रजस्वला भएको अवस्थामा छाउपडीमा राख्न वा राख्न बाध्य पार्नेलाई तीन महिना कैद र तीन हजार रुपियाँ जरिवानाको व्यवस्था रहेको छ ।
Discussion about this post