बाँके माघ ६ गते । बाँकेको नेपालगन्ज उपमहानगरपालिकाको धम्बोझी चोक नजिकै अत्याधुनिक सुविधा सम्पन्न सार्वजनिक शौचालयको सोमवार उद्घाटन गरिएको छ ।
नेपालगन्ज उपमहानगरपालिकाका मेयर डा. धवल सम्शेर राणाले नेपालगन्जको धम्बोझीमा स्वंचालित सार्वजनिक शौचालयको उद्घाटन गर्नुभएको हो ।
निर्माण भएको लामो समय भैसक्दा पनि सुचारु हुन नसकेको उक्त शौचालयलाई सोमवार एक कार्यक्रमका विच मेयर राणाले रिवन काटेर उद्घाटन गर्नुभएको छ ।
संगीतमय स्वचालित शौचालयको उद्घाटन गर्दै नेपालगञ्ज उप–महानगरपालिकाका प्रमुख डा. राणाले स्वचालित शौचालय संचालनमा आउनु मात्रै उपलब्धी नभएको भन्दै यसको सहि सदुपयोगमा जोड दिनुभयो । शौचालयलाई सफा राख्नु आफैमा चुनौतीपूर्ण हुने भन्दै प्रमुख राणाले सबैको साथ आवश्यक भएको बताउनुभयो ।
नगरको वडा नं. १२ स्थित रहेको उक्त शौचालयमा जाँदा ढोका आफै खुल्ने, हात देखाएपछि सावुन पानी आफै, र चर्पीमा बस्दा धुन बज्ने समेत रहेको अत्याधुनिक शौचालय निर्माण गरिएको हो । नेपालगञ्ज उपमहानगरपालिकाका वातावरण ईञ्जिनियर प्रकाश डिसीका अनुसार एसएनभी नेदरल्याण्ड विकास कोषले संचालन गरिरहेको स्वास्थ्य र विकासका लागि नगर सरसफाई तथा स्वच्छता कार्यक्रम अन्तर्गत ४६ लाख ३६ हजार रुपियाको लागतमा स्वचालित शौचालय निर्माण गरिएको जानकारी गराउनुभयो ।
नेदरल्याण्ड विकास नियोगले ८१ लाख १६ हजार रुपियामा निर्माण गरेका तीनवटा सुलभ शौचालय उप–महानगरपालिकालाई हस्तान्तरण गरिसकेको छ । कार्यक्रममा नेपालगञ्ज उपमहानगरपालिका वडा नम्बर १२ का वडा अध्यक्ष बुद्धिसागर सुवेदी, वडा नम्बर २ का अध्यक्ष सुनिल सिंह हमाल, सुशासन समितिका संयोजक नरबहादुर विष्ट लगायत सहभागी हुनुभएको थियो । नगरमा शौचालय नभएपछि स्थानियले शौचालयको माग समेत गर्दै आएका थिए । पछिल्लो समयमा नगरमा ३ वटा अत्याधुनिक शौचालय निर्माण भै संचालनमा ल्याएको छ ।
Discussion about this post