काठमाडौं, असोज १८ गते ।
नेकपा एमालेले संसदीय दलको बैठक बोलाएको छ । पार्टी कार्यालय च्यासलमा दिउँसो १ बजे बस्ने गरी बैठक बोलाइएको हो ।
बैठकमा एमाले अध्यक्ष एवं संसदीय दलका नेता केपी शर्मा ओलीले पार्टीबाट निर्वाचित सांसदहरूलाई विशेष निर्देशन दिने भएका छन् ।
एमालेले संसद् अधिवेशन सुरु हुनुअघि र अधिवेशन सकिएपछि संसदीय दलको बैठक बोलाउँदै आएको छ । अधिवेशन अवधिमा पार्टीका तर्फबाट भएका गतिविधि तथा संसद्मा खेलेको भूमिकाको समीक्षा गर्न बैठक बस्ने गरेको एमालेले जनाएको छ ।
संसदीय दलकी उपनेता पद्मा अर्यालले गएको संसद् अधिवेशनमा पार्टीका तर्फबाट खेलेको भूमिकाको समीक्षा बैठकमा हुने बताइन् । उनले आगामी दिनमा सांसद तथा पार्टी नेताहरूले खेल्नुपर्ने भूमिकाबारे पनि अध्यक्ष ओलीले विशेष निर्देशन दिने जानकारी दिइन् ।
‘गएको अधिवेशनमा पार्टीका तर्फबाट खेलेको भूमिकाको समीक्षा हुन्छ । आगामी दिनमा सांसद र पार्टी नेताहरूले खेल्नुपर्ने भूमिकाबारे अध्यक्षले विशेष निर्देशन दिनुहुनेछ,’ अर्यालले बताइन् ।
Discussion about this post