खोजखबर संवाददाता
बाँके साउन ७ गते । नेपालगन्ज क्षेत्रका विद्यालयमा कार्यरत शिक्षकहरुका लागि १० दिने योग शिक्षा प्रशिक्षण तालिम मंगलबारदेखि सुरु भएको छ।
नेपालगन्ज उप-महानगरपालिकाको सहयोगमा नेपाल शिक्षक महासंघ , नेपालगन्ज नगरसमितिको आयोजनामा सो तालिम नेपालगन्जमा सुरु भएको हो।
तालिमको उद्घाटन सत्रमा नेपालगन्ज उप- महानगरपालिकाका कार्यवाहक प्रमुख उमा थापाले स्वस्थ्य जीवनका लागि योग शिक्षा निर्विकल्प रहेको बताउदै विद्याथीहरुलाई यसबारे नियमित अभ्यास गराउनुपर्नेमा जोड दिनुभयो।
कार्यक्रममा नेपालगन्ज उद्योग वाणिज्य संघका अध्यक्ष नन्दलाल वैश्य, नेपाल शिक्षक संघ- बाँके अध्यक्ष वीरेन्द्र यादव, नेपाल शिक्षक महासंघ नेपालगन्ज नगर समिति अध्यक्ष मनोजराजा श्रीवास्तव, विद्धिजिवी डा.विजय प्रधान, समाजसेवी घनश्याम वैश्यलगायतले आ-आफ्ना धारणा राख्दै विद्यालयमा योग शिक्षाको निरन्तर अभ्यास आवश्यक रहेको बताउनुभएको थियो।
नेपालगन्जका सामुदायिक,संस्थागत,मदरसा विद्यालयतर्फका गरि कार्यरत ४० जनाभन्दा बढी शिक्षकहरुको सो तालिममा सहभागिता रहको आयोजकले जनाएको छ। विद्यालयमा सीप र ज्ञानको अभावमा अझैपनि योगको व्यवहारिक कार्यन्वयन हुन नसकेपछि सीप विकासका लागि पहिलो चरणमा केही शिक्षकहरुबाटै सुरुवात गर्दै सो तालिम थालिएको नगर अध्यक्ष श्रीवास्तवाले जनाउनु भएकोछ।
विद्यालय शिक्षाको पाठयक्रममा योग शिक्षा समावेश रहेतापनि अध्यापनरत कतिपय शिक्षकहरु आफैं योग अभ्यासबारे जानकार नभएकाले पनि यो तालिम थप उपयोगी रहने अपेक्षा राखिएको छ।
तालिमपछि प्रशिक्षित शिक्षकहरु विद्यालयभित्र विभिन्न समयमा विद्यार्थीहरुबीच योग शिक्षा र अभ्यासको प्रयोग गर्नुहुने विश्वास लिइएको छ।
योगगुरु कृष्णा पान्डेले मुख्य प्रशिक्षण दिनुहुने कार्यक्रम रहेको जनाइएको छ। १० दिनसम्म चल्ने सो तालिम दैनिक बिहान लगभग २ घण्टा योगका विभिन्न आसन र फाइदा लगायतका बारे प्रशिक्षण दिइने जनाइएकोछ।
नेपाल शिक्षक संघ नेपालगन्ज नगर अध्यक्ष कंचन आचार्यले स्वागत गर्नुभएको सो उदघाटन सत्रको संचालन शिक्षक महासंघ नेपालगन्ज नगर सचिव केशव शर्माले गर्नुभएको थियो।
Discussion about this post