खोजखबर संवाददाता
बाँके साउन ७ गते । नेपालगञ्ज उपमहानगरपालिकाले केही दिनभित्रै नगर क्षेत्रमा सार्वजनिक बस संचालन गर्ने भएको छ । बस संचालनका लागि कार्यविधि निर्माण कार्य अन्तिम चरणमा पुगेको प्रमुख प्रशासकीय अधिकृत हरी प्याकुरेलले बताउनुभयो ।
बस संचालनका लागि मंगलबार चालक छनौंटका लागि प्रयोगात्मक परीक्षा लिइएको छ । चालक छनौंट प्रक्रियालाई पारदर्शी र निष्पक्ष बनाउन यातायात ब्यवस्था कार्यलय, ट्राफिक प्रहरी कार्यालय, यान्त्रिक कार्यालयको सहयोगमा प्रयोगात्मक परीक्षा (ट्रायल) लिइएको हो । आवेदकहरुले पहिले नै यातायात ब्यवस्था कार्यालयबाट सवारी चालक अनुमती पत्र लिएको भएपनि भर्ना प्रक्रियालाई पारदर्शी बनाउन पुनः ट्रायल लिइएको हो, प्रमुख प्रशासकीय अधिकृत प्याकुरेलले भन्नुभयो,– अधिकाँश आवेदकहरु ट्रायलमै असफल भएका छन् ।
कार्यबाहक प्रमुखको जिम्मेवारीमा रहनुभएका उपप्रमुख उमा थापा मगरको उपस्थितीमा परीक्षा भएको हो ।
उपमहानगरपालिकाले ईबिडिङ्ग मार्फत सार्वजनिक खरिद प्रक्रिया पुरा गरि सानो तीनवटा बस एक करोड २९ लाख ७४ हजार ७०० र ठुला चारवटा बस दुई करोड १५ लाख ७६ हजार रुपियामा खरिद गरेको हो । खरिद गरिएका बस उपमहानगरपालिकामै छन् ।
बस खरिद गरिदा लागत स्टिमेट भन्दा चार लाख ४९ हजार ३०० रुपिया कममा बस खरिद गरिएको छ । उपमहानगरपालिकाका लेखा अधिकृत राजन केसीका अनुसार, २०७५ साल पुष २६ गते संघीय मामिला तथा स्थानीय विकास मन्त्रालयमा उप–महानगरपालिकाले लक्षित वर्गलाई दृष्टिगत गरि कार्यक्रम संचालन गर्न साझेदारी विकास कार्यक्रम अन्तर्गत विपन्न वर्गसँग स्थानीय सरकार सहितको कार्यक्रम संचालनका लागि बजेट माग गरिएकोमा विशेष अनुदान अन्तर्गत गाउँ नगर साझेदारी कार्यक्रम संचालन गर्न ५ करोड अनुदान प्राप्त भएको हो ।
बस खरिद कार्यलाई पारदर्शी बनाउनका लागि उप–महानगरपालिकाले गठन गरेको साझेदारी विकास कार्यदलले ठुला चारवटा र मझौला तिनवटा बस खरिद गर्ने निर्णय चैत १३ गते गरेपछि बोर्डले स्वीकृत गरेको हो । कार्यपालिकाको निर्णय अनुसार, विद्युतीय खरिद प्रर्णाली संचालित निर्देशिका २०७४ अनुसार ई–विडिङ्ग गरि बस खरिद गरिएको हो, लेखा अधिकृत केसीले भन्नुभया । नेपालगञ्ज उप–महानगरपालिकाका प्रमुख डा. धवलशम्शेर राणाले सार्वजनिक यातायात नपुगेका क्षेत्रमा आम जनताको सहजताका लागि बस संचालन गर्न लागिएको भन्दै नगरबासीबाट रचनात्मक सुझावको अपेक्षा गरिएको बताउनुभयो । नेपालगञ्ज उपमहानगरपालिका र आसपासका क्षेत्रमा नगर बस संचालन गर्न लागिएको हो ।
Discussion about this post