बाँके चैत १९ गते । सिमा नाका बन्द भएको अवस्थामा भारतको बिभिन्न ठाउँबाट आएका नेपाली सरकारको आदेश बिना नेपालमा प्रवेश गरेकाले अलपत्र परेका छन् । नेपाल–भारत सिमा क्षेत्र जमुनाहामा अलपत्र परेका उनीहरुलाई नेपाल सरकारले भित्रिन आदेश नदिएपछि भारतीय प्रहरीले सोमबार राती नेपाल प्रवेश गराएको थियो । देशभर लकडाउन र आवतजातमा सरकारले प्रतिबन्ध लगाएका कारण नेपाल प्रवेश गरेकाहरु अहिले आफ्नो घर जान सकेका छैनन् ।
सरकारले बाहिरी देशबाट कसैलाई प्रवेश गर्न नदिने आदेशका कारण सीमा क्षेत्रस्थित शुख्खा बन्दरगाहमा उनीहरुलाई बसाइएको छ । यो अवस्थामा उनीहरु भोकभोकै बस्नुपरेको छ ।
भारतीय बजार रुपैडिहामा अलपत्र परेका बेला त्यहाँको प्रहरीले उनीहरुलाई बिहानको नास्ता तथा स्थानीइ युवा व्यपारीहरुले दिउँसोको खाना खुवाएका थिए । दुबै देशको सहमति अनुसार नेपालबाट आदेश नभएपछि सोमबार अबेर राती भारतीय प्रहरीले नेपाल प्रवेश गराएपछि उनीहरु बिचल्लीमा परेका छन् । यता आदेश नहुँदा नै उनीहरु अहिले न आफ्नो घर जान पाइरहेका छन् नत क्वारेन्टाइनमा नै बस्न पाएका छन् ।
यस्तो अवस्थामा नेपालगञ्ज उपमहानगरपालिकाले उनीहरुको उद्धार गरेर क्वारेन्टाइनमा राख्न चाहेपनि सकिरहेको छैन । नेपालगञ्जकी उपमेयर उमा थापा मगर भन्छिन्, प्रसाशानको आदेश छैन, त्यसकारण क्वारेन्टाइनमा पनि ल्याउन सकिरहेका छैनौं ।
लकडाउनका कारण भोकै रहेका उनीहरुलाई क्वारेन्टाइनमा ल्याउन नसकेको भएपनि खाना खुवाउने व्यवस्था भने मिलाएका छौं । दशगजामा अलपत्र नेपालीलाई सुरक्षित तरिकाले क्वारेन्टाइनमा राख्ने आफ्नो पनि जिम्मेवारी रहेको तर आदेशका कारण गर्न नसकिएको उपमेयर थापाले बताउनुभयो ।
उद्धार हुन नसकेका तथा भौकै बसेका उनीहरुलाई शिख समुदायको गुरूद्धारा श्री गुरूनानक सिंह सभाले खाना नास्ता खुवाएको छ । उपमहानगरपालिकाको नगर प्रहरी, प्रहरी निरिक्षक सूर्य बोगटी, प्रहरी सहायक निरिक्षक विकाश गौतमको टोलीले दशगजा क्षेत्र पुगि खाना नास्ता खुवाएको छ । दुई दिनदेखि यसरी अलपत्र परेकालाई आज बुधबार पनि खाना र पानीको व्यवस्था गरेको छ । कोरोना भाईरस सक्रमणको जोखिमका कारण सीमा क्षेत्रमा भारतबाट नेपाल फर्कनेको दिनदिनै लर्को नै लाग्ने गरेको छ ।
Discussion about this post