काठमाडौं बैशाख १७ गते । पार्टी र सरकारको नेतृत्व धरापमा परेपछि प्रधानमन्त्री केपी शर्मा ओलीले आत्मालोचना गर्ने भएका छन । बुधबार बेलुकी ५ बजे बालुवाटारमा बस्ने बैठकमा प्रधानमन्त्री ओलीले अध्यादेश प्रकरण र पार्टीभित्र सिर्जित पछिल्लो समस्यालाई सम्बोधन गर्न पहिले आत्मलोचना गर्ने तयारी गरेका छन ।
प्रधानमन्त्री र अध्यक्ष पदबाट हटाउन अर्का अध्यक्ष प्रचण्ड र बरिष्ठ नेता माधव नेपालले ठोस रणनीचि चालेपछि त्यसलाई मत्थर पार्न ओलीले आत्मलोचनासहित बैठकमा प्रस्तुत हुने योजना बनाएको बालुवाटार स्रोतले जनाएको छ ।
विगतदेखि नै ओलीको कार्यशैलीप्रति नेताहरुमा विवाद उत्पन्न हुने भएपनि अहिलेको जस्तो संकट उनलाई यसअघि परेको थिएन । एकपटकलाई मौका दिन र सरकार परिवर्तन हुँदा पार्टी र सरकार दुबैलाई अफ्ठेरो पर्ने भएकाले बरु आत्मालोचना गरेर अघि बढ्ने सल्लाह नेता नेपालसँग भएको ओली पक्षका नेताहरुले बताएका छन । यस विषयमा अर्का अध्यक्ष प्रचण्ड र बरिष्ठ नेता नेपालसँग पनि ओलीको गम्भिर छलफल भएको छ ।
प्रधानमन्त्री फेर्नेबारे प्रचण्ड तयार भएपनि माधव नेपाल भने तयार छैनन् । नेपालले आफुलाई अध्यक्ष पद चाहिने बताएका छन । यसका लागि लामो वार्ता भएपनि निष्कर्षमा पुग्न नसकेपछि आजको सचिवालय बैठकमा आत्मालोचना गरेर स्थायी कमीटि बैठक बोलाउनेबारे ठोस छलफल हुने प्रधानमन्त्रीको सचिवालयले जनाएको छ ।
गएको बैशाख ८ गते प्रधानमन्त्री ओलीले दल फुटाउने अध्यादेश ल्याएकै बेलुकी सचिवालय बैठक बसेको थियो । तर बैठक चलिरहेका बेला राष्ट्रपतिबाट अध्यादेश प्रमाणीकरण आएको खबर आएपछि नेताहरु बैठकबाट उठेर हिडेका थिए । त्यसयता लामो छलफल, वार्ता र रस्साकस्सीपछि नेकपाको सचिवालय बैठक बस्न लागेको हो ।
Discussion about this post