गुल्मी असार १० गते ।
नेपालमा कोरोनाका संक्रमित दिनानुदिन बढी रहेका छन्। देशमा दैनिक पाँच सयको हाराहारीमा कोरोनाका बिरामी थपिँदै छन्। नेपालमा १० हजार भन्दा बढी संक्रमित पुगेका छन्। रोग भन्दा हल्ला त्रास पनि बढी देखिन्छ। दिनभर सामाजिक काममा ब्यस्त भई साँझ घरमा फर्किदा परिवार र छिमेकीले कतै कोरोना लिएर त आएनन् भन्दै शंका गर्ने गर्छन्।
गुल्मीका एक वडा अध्यक्षले दैनिक रुपमा एका बिहानै २ लिटर दुध लिएर तम्घासको आइसोलेशनमा बसेका कोरोना संक्रमितको स्वास्थ्य अबस्था कस्तो छ भन्दै पुग्ने गरेका छन्। जिल्लाको रेसुंगा नगरपालिका–९ का वडा अध्यक्ष नारायण बरालले दैनिक रुपमा आफू २ लिटर दुध लिएर बिरामीहरुको स्वास्थ्य अबस्था बुझ जाने गरेको बताएका छन्।
आत्मबल र दृढ विश्वासले कोरोनालाई सहजै रुपमा जित्न सकिने उनको सुझाब छ। खानपानसँगै तनाव नलिनका लागि पुस्तकहरू पढ्ने, गीत सुन्ने र सामाजिक संजालमा आएका होहल्लाको पछि नलाग्न बरालको आग्रह छ। बिगत २५ दिन देखि दैनिक रुपमा बिहान २ लिटर दुध लिएर पुग्ने गरेका बरालले उनीहरुसँगै एकैछिन भलाकुसारी गरेर आउने गरेका छन्। बिहान मात्रै नभई दिनको दुई तीन पटक उनी आइसोलेशनमा जाने र त्यहाँको अबस्थाबारे बुझ्ने गरेका छन्।
बाहिर जस्ले जे भनेता पनि आफूले सक्दो सहयोग गर्नुपर्दछ भन्दै ब्यक्तिगत रुपमा दुध लिएर भेटन जाँदा बिरामीहरुलाई आत्मबल पनि बढ्ने गरेको र आफनो कर्तब्य पनि भएको उनले बताउँदै आएका छन्। रेसुंगा नगरपालिका–९ को आइसोलेशनमा ९ जना कोरोनाका बिरामीहरु बस्दै आएका छन्।
उनीहरुले एका बिहानै दुध लिएर भेटन आउँदा र स्वास्थ्य अबस्था कस्तो छ भनेर बुझदा आफूहरुलाई आफ्नै नजिकको अभिभावक आएजस्तो अनुभूति भएको आइसोलेशनमा बसेका एक युवा बताउँछन्। आफनै मान्छेहरुले पनि संक्रमितलाई घृणाको रुपमा हेर्ने गरेको उनीहरुले बताएका छन्।
जनप्रतिनिधि एका बिहानै दुध लिएर भेटन आउँदा आफूहरुलाई धेरै खुसी लागेको उनीहरुको भनाइ छ।
Discussion about this post