काठमाण्डौ साउन ३२ गते ।
सिन्धुपाल्चोकको जुगल गाउँपालिका लिदीका पहिरो प्रभावितको उद्धार, व्यवस्थापन र राहतको लागि थप टोली प्रभावित क्षेत्रतर्फ जाने भएको छ। आज आइतबार गाउँपालिकाका जनप्रतिनिधिसहित थप स्वास्थ्य टोली र स्काभेटर लैजाने तयारी भैरहेको गाउँपालिकाका अध्यक्ष होमनारायण श्रेष्ठले जानकारी दिए।
गत शुक्रबार बिहान गएको पहिरोमा परी लिदीमा ज्यान गुमाउनेको सङ्ख्या १८ पुगेको छ भने २१ जना अझै हराइरहेका छन्। पहिरोमा हराइरहेकाको आज पनि बिहानदेखि खोजीकार्य सुरु भएको छ। पहिरोमा परी घाइते भएकाहरुको चौतारा र काठमाण्डौको सिभिल अस्पतालमा उपचार भइरहेको छ।
पहिरोबाट प्रभावित लिदीका १७२ घरधुरीमध्ये अति जोखिममा परेकाहरुलाई तत्काल सुरक्षित ठाउँमा सारिने भएको छ। क्षति भएका र जोखिममा रहेका घरको तथ्याङ्क संकलनको काम पनि भइरहेको छ। लिदीको बस्ती सुरक्षित ठाउँमा सार्नुपर्ने देखिएको र दीर्घकालीन रूपमा पालिका, प्रदेश सरकार र सङ्घीय सरकारको समन्वयमा जग्गा खोजेर सुरक्षित ठाउँमा सार्ने वाग्मती प्रदेशका सामाजिक विकासमन्त्री युवराज दुलालले बताए।
Discussion about this post