खोजखबर संवाददाता
बाँके भदौ २७ गते । सहरी विकास मन्त्री मोहम्मद इस्तियाक राईले हुलाकी सडकसंग जोडिएका गाउँहरुलाई हुलाकी सहरका रुपमा विकास गरिने बताउनुभएको छ ।
बाँकेको नरैनापुरमा नवनिर्मित लक्ष्मणपुर प्राथमिक स्वास्थ्य केन्द्र भवनको आज उद्घाटन गर्दै मन्त्री राईले नरैनापुरलाई १० बर्षभित्र हुलाकी सहरका रुपमा विकास गर्न प्रत्येक बर्ष १ अर्बका दरले १० बर्षमा १० अर्ब रुपैयाँ छुट्ट्याइने बताउनुभयो ।
नरैनापुरका सबै घरलाई तीन बर्षभित्र फुसरहित बनाइने मन्त्री राईले बताउनुभयो । उहाँले लक्ष्मणपुर स्वास्थ्य केन्द्रलाई १५ शैयाको अस्पताल बनाउने योजना स्विकृत भइसकेकाले अब भौतिक पूर्वाधार निर्माणका साथै जनशक्ति व्यवस्थापन गरिने बताउनुभयो । जोखिमयुक्त बस्तीहरुलाई जोखिमबाट जोगाउन सरकारले विशेष प्राथमिकताका साथ काम गरिरहेको मन्त्री राईको भनाई छ ।
जिल्ला समन्वय समितिका संयोजक अजय श्रीवास्तबले ढिलै भएपनि सुविधा सम्पन्न अस्पताल निर्माण हुने बघौडाबासीका लागि खुसीको क्षण भएको बताउनुभयो ।
गाउँपालिकाका अध्यक्ष इस्तियाक अहमद शाहले नरैनापुरको सर्वाङ्गीण विकासका लागि आफू लागिपरेको बताउँदै पिछडिएको क्षेत्रका विकासका लागि थप बजेट उपलब्ध गराउन आग्रह गर्नुभयो ।
सो अवसरमा समाजवादी पार्टीका केन्द्रिय सदस्य बाबु खाँ पठान, समाजवादी पार्टी प्रदेश ५ का कोषाध्यक्ष अम्बिका काफ्ले, समाजवादी पार्टी बाँकेका अध्यक्ष कमरुद्दिन राई, महिला अध्यक्ष उषा गौतम लगायत नरैनापुरका जनप्रतिनिधीको उपस्थिति रहेको थियो ।
३ करोड १९ लाखको लागतमा बनेको नरैनापुर गाउँपालिकाको वडा नम्बर २ लक्ष्मणपुरस्थित लक्ष्मणपुर स्वास्थ्य केन्द्र निर्माणका लागि २०६८ साल भदौ २० गते १८ महिनामा निर्माण सम्पन्न गर्ने गरी सम्झौता भएपनि ८ बर्षपछि मात्र भवन निर्माण सम्पन्न भएको छ । संघीय सहरी विकास आयोजना कार्यान्वयन इकाई नेपालगञ्जले भवन निर्माण गरेर गाउँपालिकालाई हस्तान्तरण गरिसकेको छ । प्राथमिक स्वास्थ्य केन्द्रमा एक जना एमविविएस डाक्टरहित १३ जनाको दरबन्दी रहेको छ ।
Discussion about this post