बाँके जेठ २८ गते ।
बाँकेको कोहलपुर स्थित नेपालगन्ज मेडिकल कलेज शिक्षण अस्पताल कोहलपुरमा उपचाररत कोरोना संक्रमित र कुरुवाका लागि नेकपा एमाले (नेपाल खनाल) समुहले संचालनमा ल्याएको भान्सा घरमा ८ हजारले खाना खाएका छन् ।
कोभिड महामारीमा विरामी तथा कुरुवालाई सहज र सरल सेवा प्रवाहका लागि नेकपा एमालेले भान्सा घर संचालनमा ल्याएको थियो । भान्सा घरमा प्रतिदिन करिब २ सय ५० जनालाई शौलियत दरमा शुरुवात गरेको २७ औं दिनसम्म ८ हजार जनाले खाना खाएको नेकपा एमाले बाँके जिल्ला सचिवालय सदस्य अब्दुल हुसैन खानले बताउनुभयो।
भान्सा घर बिहान ९ बजेदेखि १२ बजे बेलुका ६ बजेदेखि ९ बजेसम्म खुल्ला गरेर सेवा प्रदान गरिएको छ। भान्सामा दैनिक प्रतिछाक करिब १५ हजार खर्च हुने गरेको छ भने हप्ताको दुईपटक मासु खाना हप्तामा ४ दिन दुध बितरण गर्ने गरिएको छ।
शुक्रबार सम्म खाना बाट करीब रु २ लाख ५२ हजार संकलन भएको छ।संकलित रकम यस्तै अन्य पुन्यकार्यमा लगाउने योजना भएको भान्सा घर संन्चालन समितिका संयोजक टेक बहादुर शाहीले जानकारी दिनुभयो।
रु ३० मा गुणस्तरीय खाना खान पाइने उहाँको भनाइ छ । बन्दाबन्दीमा होटलहरु बन्द हुने भएकाले भान्सा घर संचालनमा ल्याइएको एमाले बाँकेका अध्यक्ष अशोक कोइरालाले बताउनुभयो ।
Discussion about this post