बाँके, असोज २३ गते ।
मोबाइल, इन्टरनेट र सामाजिक सञ्जालको प्रयोग बढेसँगै कुनै समय चिठीपत्र आदानप्रदानका भरपर्दा माध्यम बनेका पत्र मञ्जुषा र पोष्ट बक्सको प्रयोग घट्दै गएको छ ।
जिल्ला हुलाक कार्यालय बाँकेको परिसरमा रहेको पत्र मञ्जुषामा अहिले चिठीपत्र आउन छाडेको जिल्ला हुलाक कार्यालय बाँकेका प्रमुख गजेन्द्रप्रकाश थारूले बताए । सेवाग्राहीले जुनसुकै समयमा चिठीपत्र खसाल्न सक्ने व्यवस्था भए पनि प्रविधिको विकाससँगै यसको प्रयोग घटेको उनले बताए ।
थारूका अनुसार बाँकेमा हालसम्म ९० वटा पोष्ट बक्स नम्बर लिइएकोमा सातदेखि आठ वटा मात्र सञ्चालनमा छन् । अधिकांश पोष्ट बक्स नवीकरण भए पनि नियमित प्रयोगमा नरहेको उनले बताए ।
चिठीपत्रको प्रयोग घटे पनि हुलाक सेवाले द्रुत डाँक सेवा (इएमएस) मार्फत कागजात तथा पार्सल आदानप्रदान गर्दै आएको छ । हुलाक सेवा विभागका अनुसार नेपालका ४५ जिल्ला र विदेशका ३९ देशका ४२ स्थानमा इएमएस सेवा उपलब्ध छ । त्यस्तै, ९३ गन्तव्यमा वैदेशिक हुलाक वस्तु पठाउने व्यवस्था रहेको छ ।
नेपालमा विसं १९३५ मा नेपाल हुलाक घरको स्थापनासँगै संस्थागत हुलाक सेवाको सुरुआत भएको हो । अन्तर्राष्ट्रिय हुलाक सेवामा सहकार्य बढाउने उद्देश्यले सन् १८७४ अक्टोबर ९ मा विश्व हुलाक सङ्घ स्थापना भएको थियो । सन् १९६९ मा अक्टोबर ९ लाई विश्व हुलाक दिवसका रूपमा मनाउने निर्णय गरिएको थियो । नेपालले सन् १९५६ जुलाई ११ मा सङ्घको सदस्यता प्राप्त गरेको थियो ।
डिजिटल प्रविधिको विकाससँगै परम्परागत हुलाक सेवाको प्रयोग घटे पनि कागजात तथा पार्सल आदानप्रदानमा यसको उपयोगिता कायम छ । बदलिँदो आवश्यकताअनुसार सेवा प्रभावकारी बनाउनु र नागरिकलाई उपलब्ध सेवाबारे जानकारी गराउनु आवश्यक देखिएको छ ।
Discussion about this post