अनावीया दुर्घटना प्रकरणः एक घण्टा धर्नासहित सिडिओलाई ज्ञापनपत्र, नेपालगन्जमा प्रदर्शन

बाँके असोज ७ गते ।
मोटरसाइकलको ठक्करबाट ज्यान गुमाएकी अढाइ वर्षीया बालिका अनावीया राइको न्यायका लागि आज नेपालगन्जमा प्रदर्शन गरिएको छ । बालिकालाई ठक्कर दिने मोटरसाइकल अहिलेसम्म प्रहरीले फेला पार्न नसकेपछि दवाव दिन दिउँसो त्रिभुवन चोकमा प्रदर्शन गरिएको होे ।

दवावमुलक प्रदर्शनलाई सम्वोधन गर्दै अधिकारकर्मी साहिदा वानु, बालअधिकारकर्मी साहिल अनसारी, सामाजिक अभियान्ता प्रकाश कुँवरलगायतले दोषीको पहिचान गरेर तत्काल कारवाही गर्न माग गर्नुभयो ।

एउटी नाबालिकाको न्यायका लागि सडकमा आउनु दुःखद भएको भन्दै उहाँहरुले यसलाई आफ्नो बाध्यता भन्नुभएको थियो ।

प्रहरी प्रशासनले निष्पक्ष भएर घटनाको छानविन गर्नुपर्ने, पीडित परिवारलाई क्षतिपूर्ति दिनुपर्ने, दोषीको पहिचान गरी कारवाही गर्नुपर्ने लगायतको माग राखेर बृह्त नागरिक आन्दोलनका नाममा विरोध प्रदर्शन गरिएको हो ।

सहभागीहरुले त्रिभुवन चोकमा राखिएका सिसिक्यामेराको तत्काल मर्मत गरी सुचारु गर्नुपर्ने, त्रिभुवन चोकमा ट्राफिक प्रहरी राख्नु पर्ने, ठाउँठाउँमा ब्रेकर राख्नु पर्नेलगायतका माग समेत गरेका थिए ।

अधिकारकर्मी शोएव अनसारीले मेयर धवल शम्शेर राणाले नगरबासीको सुरक्षामा कुनै वास्ता नगरेको बताउनुभयो ।

यस्तै मृतक बालिकाका ठुलो बुवा अल्ताव राईले एक हप्ताभित्र माग सम्वोधन नभए आन्दोलनको चेतावनी दिनुभयो ।

यही मागसहितको ज्ञापनपत्र उनीहरुले बाँकेका सिडियो शिवराम गेलाललाई समेत बुझाएका छन् । उनीहरु जिल्ला प्रशासनमा एक घण्टा धर्नामा समेत बसेका थिए ।

भदौ सात गते ती बालिकालाई त्रिभुवन चोकमा मोटरसाइकलले ठक्कर दिँदा मृत्यु भएको थियो । तर ठक्कर दिने मोटरसाइकलको अहिलेसम्म प्रहरीले पहिचान गर्न सकेको छैन् ।

घटनापछि वडा प्रहरीका इन्चार्ज डिल्ली खड्काले तीनदिन भित्र दोषीलाई पक्राउ गरी कारवाहीको बाचा गरेका थिए । तर अहिले उनी घटनाबारे चासो नै लिन छाडिसकेका छन् ।

बाँकेका एसपी श्यामकृष्ण अधिकारीले पनि १५ दिनभित्र दोषीलाई पक्राउ गर्ने बाचा दिएका थिए । उनले गरेको वाचाले पनि महिना दिन पुरा गरिसक्यो ।

तर कार्यान्वयन भएको छैन् । वडाका इन्चार्ज खड्काको सरुवा हुन थालेपछि उनी घटनाबारे चासो लिन छाडिसकेका छन् ।

भिडियो सहित