बाँके कार्तिक १८ गते ।
नेपालगन्ज धम्वोजीदेखि तीन सय मिटर पूर्व दक्षिण बागेश्वरी मन्दिर छेउमै उषा बैश्यको पुजा सामग्रीको पसल छ ।
तीन हप्ता अघिसम्म पुजाका सामग्री पाइने बैश्यको पसललाई अहिले तिहारको मालाले छप्पक छोपेको छ । बैश्यको जस्तै अहिले बागेश्वरी मन्दिर छेउछाउ पुजा सामग्री पाइने अधिकांश पसलहरु हिजोआज कृत्रिम फुलका मालाले सजिएका छन् ।
बाँके डुडुवा गाउँपालिका ४ कम्दीकी रुपा ओली आफ्नो भाइको लागि कृत्रिम माला किन्दै हुनुहुन्छ । छिटो छरितो पनि हुने र आकर्षक पनि देखिने भएकाले रुपाले कृत्रिम माला किन्नुभएको हो ।
तिहारमा भाइटीकाका लागि वारीमै फुलेका सयपत्रि, गोदावरी र मखमलीका मालाहरु प्रयोग गरिनु पर्ने हो । तर पछिल्लो समय भने कृत्रिम मालाको प्रयोग बढ्न थालेको छ ।
व्यस्त जीवनशैली, छिटो र छरितो पनि हुने भएकाले दिदीवहिनीहरुले कृत्रिम माला किन्ने गरेका हुन् । नेपालगन्जको बागेश्वरी मन्दिरसँगै घरबारीटोल, धम्वोजी, त्रिवेणीमोड, त्रिभुवनचोक लगायतका स्थानमा करिव चार दर्जनबढी कृत्रिम मालाका पसल छन् ।
यस्ता कृत्रिम मालाहरु उनीहरुले भारतबाट भित्र्याउने गर्छन् । भन्सार महंगो हुँदा मालाको आयात बढ्ने र उपभोक्तालाई महंगो मूल्य मर्ने भएकाले तुलनात्मकरुपमा व्यापार सन्तोषजनक नभएको राजु सिक्देलको भनाइ छ ।
नेपालगन्जमा भित्रने भारतीय माला पहाडी तथा हिमाली जिल्लामा समेत पुग्ने गर्छ । करिव १५ बर्षदेखि कृत्रिम मालाको व्यापार गर्दै आउनुभएकी उषा बैश्यले भारतबाट भित्र्ने माला सुर्खेत, जाजरकोट, जुम्लालगायतका पहाडी जिल्लामा पुग्ने गरेको बताउनुहुन्छ ।
तिहारका लागि चाहिने फूल तथा मालामा बाँकेलाई आत्मनिर्भर उन्मुख गराउन सकिने सम्भावना भएको अगुवा कृषकहरु वताउँछन् । यो वर्ष तिहार पछि परेकाले सयपत्रि, गोदावरी र मखमली फूल सीमितका बारीमा फुलिरहेका छन् ।
तर अधिकांशले कृत्रिम मालाकै जोहो गरेर भाइटीका लगाउने तयारी गरिरहेका छन । थोरै जागर चलाउने हो भने आफ्नो कौशी तथा गमलामा पनि फुल रोपेर तिहारमा मालाको अभाव टार्न सकिने देखिन्छ ।
Discussion about this post