बाँके कार्तिक १८ गते ।
चाडपर्वसँगै नेपालगन्जमा भीडभाड बढी छ । खासगरी तिहारको लक्ष्मी पुजाका कारण आज दिनभर अरु दिन भन्दा बढी भीडभाड देखियो । आजसम्म अप्रिय त्यस्ता कुनै घटना नगरमा नभएको वडा प्रहरी कार्यालयका इन्चार्ज डिल्लीबहादुर खड्काले बताउनुभयो ।
चाडपर्व लक्षित सुरक्षा योजना लागु गरेको बाँके प्रहरीले त्यहीअनुसार मातहतले पनि चेकजाँच तथा सुरक्षा व्यवस्थापन मिलाइरहेको इन्चार्ज खड्काले बताउनुभयो ।
चाडपर्वको बेला रमाइलोको नाममा जुवातास खेल्ने, पटका पटकाउने, आतिसवाजी गर्नेलगायतका कार्यहरु हुने गरेको भएपनि त्यस्ता कानुन वर्जित कार्यहरुलाई निरुत्याहीत गर्ने सवालमा प्रहरी अहोरात्र खटिएको उहाँको भनाइ छ ।
पछिल्लो समय प्रहरीले जुवातास खेल्नेप्रति आक्रामक बनेको छ । प्रहरी जुवाडेविरुद्ध कडारुपमा प्रस्तुत भएपछि उनीहरुले पनि नयाँ नयाँ जुक्ती निकाल्ने गरेका छन् । जुवा एक ठाउँ खेल्ने तर पैसा अर्कै ठाउँमा कारोवार गर्ने गरेको पाइएको अनुसन्धानमा संलग्न अधिकारीहरुले बताए । चोरीलुटपाटका घटनाप्रति पनि प्रहरी सजकता र सतर्क अवस्थामा रहेको जनाइएको छ ।
खासगरी नेपालगन्जको अति व्यवस्त त्रिभुवन चोकदेखि त्रिवेणी मोडसम्म प्रहरीले सुरक्षा पहरालाई बढाएको छ । तिहारमा यो ठाउँमा चौविसै घण्टा बजार लाग्छ । त्यही भएर प्रहरीको थप जनशक्ति परिचालन भएको छ ।
यो पटक शान्त र सौहार्दपूर्ण तरिकाले पर्व मनाइरहेको पाइएको पनि इन्चार्ज खड्काले बताउनुभयो । उहाँले अघिल्ला वर्षजस्तो प्रहरीलाई धपेडी नभएको पनि बताउनुभयो । खड्काको नेतृत्वमा नगरको शान्ति सुरक्षा मजवुत र व्यवस्थित बन्दै गएको छ।
Discussion about this post