बाँके माघ १२ गते ।
जिल्ला विपद व्यवस्थापन समिति, बाँकेले हिरमिनियाका मगन्तालाई कम्बल वितरण गरेको छ ।
डुडुवा गाउँपालिका वडा नं. १, मगन्ताटोलका ४२ घरपरिवारलाई जिल्ला विपद व्यवस्थापन समितिले कम्बल वितरण गरेको हो ।
मगन्ताटोलमा एक सय १२ घर रहेको छ । नेपाली सेनाको भैरवप्रसाद गण, रोयल नेपालगञ्ज फुटबल क्लव, वेष्टर्न अस्पतालले संयुक्त रुपमा यसअघि त्यहाँका गर्भवती, जेष्ठ नागरिकलाई प्राथमिकता दिएर ७० जनालाई कम्बल वितरण गरेको थियो । त्यतिबेला छुटेका ४२ घरपरिवारलाई जिल्ला विपद व्यवस्थापन समितिले कम्बल दिएको हो ।
सहायक प्रमुख जिल्ला अधिकारी टोपेन्द्रबहादुर केसी, जिल्ला विपद व्यवस्थापन समितिका सदस्य सचिव रामकुमार सोनकर, सूचना व्यवस्थापन अधिकृत रुपन ज्ञवाली, वडाध्यक्ष मोहनराम मिश्रले मगन्तालाई कम्बल वितरण गरेका थिए ।
जिल्ला विपद व्यवस्थापन समितिले चिसो प्रभावित विपन्न समुदाय र व्यक्तिलाई कम्बल वितरण गरिरहेको छ ।
सहायक प्रमुख जिल्ला अधिकारी केसीले चिसो प्रभावितलाई न्यानो प्रदान गर्न कम्बल वितरण गरेको बताउनुभयो ।
वडाध्यक्ष मिश्रले अति विपन्न मगन्तालाई कम्बल वितरण गरेर जिल्ला विपद व्यवस्थापन समितिले ठूलो सहयोग गरेको बताउनुभयो । सो अवसरमा उहाँले मगन्ता अल्पसंख्यक समुदाय भएपनि अहिलेसम्म राज्यले त्यो सूची नराखेको बताउनुभयो ।
जिल्ला विपद व्यवस्थापन समितिले चिसो प्रभावितलाई बाँड्नका लागि ६ सय थान कम्बल किनेको छ । अहिलेसम्म प्रहरीको थुनुवा, निलसागर असहाय केन्द्र, बाल सुधार केन्द्र, बागेश्वरी मन्दिर परिसरमा बसेका विपन्नलाई कम्बल बाँडिएको छ ।
Discussion about this post