बाँके माघ १८ गते ।
बाँके प्रहरीले ठूलो परिमाणमा अवैध कुखुरा बरामद गरेको छ । जिल्ला प्रहरी कार्यालय बाँकेबाट प्रहरी सहायक निरीक्षक विवेक अधिकारीको कमाण्डमा खटिएको प्रहरीको टोलीले करिव १२ क्विन्टर अवैध कुखुरा बरामद गरेको बाँकेका एसपी श्याम अधिकारीले जानकारी दिनुभयो ।
नरैनापुरका विभिन्न खुलासीमा नाकाबाट सुरक्षाकर्मीकै संलग्नतामा भारतीय कुखुरा अवैधरुपमा भित्रिने गरेको किसानहरु गुनासो सुनाउँछन् ।
नरैनापुरक्षेत्रमा खटिएका सशस्त्र प्रहरी र नेपाल प्रहरीकै संलग्नतामा प्रतिबन्धित खुकृुरा तस्करहरुले सहजरुपमा भित्र्याइरहेको स्थानीय बताउँछन् ।
स्थानीय मिकाइलले खुलीयाम तस्करी हुँदा पनि प्रहरी मौन बस्ने गरेको बताउनुभयो । उहाँले प्रहरीले देखेपनि नदेखे झै गर्ने गरेको गुनासो गर्नुभयो ।
नरैनापुरमा सशस्त्र प्रहरीका तीनवटा विओपी पोष्ट छन् । सुईया, नरैनापुर र लक्ष्मणपुर । यस्तै सुइया, लक्ष्मणपुर, कालाफँटा, नरैनापुर, भगवानपुर, फत्तेपुरमा नेपाल प्रहरीका चौकी छन् । तर उनीहरुकै संलग्नतामा अवैध तस्करका घटना भइरहेका छन् ।
पछिल्लो पटक अवैधरुपमा कुखुरा आइरहेको भन्नेबारेमा अनलाइन खोजखवरको टिम राती नै नरैनापुर पुगेको थियो । नरैनापुर चौकीका इन्चार्ज भन्दै थिए छोटुले दुई गाडी कुखुराको कुरा गरेर तीन गाडी ल्याएछ ।
यसले के पुष्टि हुन्छ भने त्यहाँका स्थानीय प्रहरीसँगको सेटिङमा तस्करहरुले भारतीय कुखुरा अवैधरुपमा नेपाल ल्याइरहेका छन् ।
एकातिर यसले गुणस्तरहीन कुखुरा खान नेपाली बाध्य भएका छन् भने अर्को तर्फ स्थानीय किसानको उत्पादनमा ठूलो नोक्सानी पुर्याइरहेको छ ।
भारतीय कुखुरा सस्तोमा पाइने भएपछि व्यपारीहरुले त्यसकै माग गर्ने गरेका छन् । भारतमा एक सय पचास रुपैयाँ किलोमा कुखुरा पाइन्छ ।
तर नेपालको उत्पादन प्रतिकिलो दुई सय ४० देखि दुई सय ५० रुपैयाँसम्म पर्छ । त्यही भएर भारतीय कुखुरा तस्करहरुले सस्तो मूल्यमा विक्री गर्ने गरेका छन् ।
नेपालगन्ज नाकामा कडाइ गरिएपछि तस्करहरुले अन्य नाकालाई टार्गेट बनाएका छन् । त्यही भएर उनीहरुले त्यहाँका स्थानीय सुरक्षाकर्मीलाई लाइन दिने गरेका छन् ।
Discussion about this post