बाँके, असोज ७ गते ।
बाँकेको नेपालगन्जमा प्रहरीले हवाई फायर गरी लागूऔषध खैरो हेरोइनसहित एक भारतीय नागरिकलाई पक्राउ गरेको छ ।
भारतको बहराइचबाट खैरो हेरोइन ल्याएर लुम्बिनी र कर्णाली प्रदेशका विभिन्न जिल्लामा बिक्री गर्ने गिरोहको निगरानीका क्रममा प्रहरीले नेपालगन्ज उपमहानगरपालिका–१४ बाट भारतीय नागरिकलाई पक्राउ गरेको हो ।
लागूऔषध नियन्त्रण ब्युरो शाखा कार्यालय नेपालगन्जबाट खटिएको प्रहरी टोलीले भारतबाट मोटरसाइकलमा नेपालतर्फ आउँदै गरेका एक व्यक्तिलाई शंकास्पद गतिविधि देखिएपछि रोक्न खोजेको थियो । प्रहरीका अनुसार रोक्न पटक–पटक दिएको चेतावनी बेवास्ता गर्दै मोटरसाइकल अघि बढाएपछि प्रहरीले दुई राउन्ड हवाई फायर गरेको थियो ।
हवाई फायरपछि प्रहरीले मोटरसाइकलसहित ती व्यक्तिलाई नियन्त्रणमा लिएर खानतलासी गरेको थियो । त्यसक्रममा भारतको उत्तर प्रदेशस्थित बहराइच जिल्ला, रुपैडिया थाना, चकिया रोड ठेगाना भएका २४ वर्षीय नदिम राईको साथबाट १०३ ग्राम ७९० मिलिग्राम खैरो हेरोइन बरामद भएको प्रहरीले जनाएको छ ।
प्रहरीले भारतीय नम्बर प्लेट यूपी ४० जे ०६५७ को मोटरसाइकल र एक थान मोबाइलसमेत बरामद गरेको छ ।
पक्राउ परेका राईलाई आवश्यक अनुसन्धान तथा कारबाहीका लागि जिल्ला प्रहरी कार्यालय बाँकेमा बुझाइएको लागूऔषध नियन्त्रण ब्युरोले जनाएको छ ।
ब्युरोका अनुसार लागूऔषध (नियन्त्रण) ऐन, २०३३ अनुसार खैरो हेरोइनको कारोबारमा संलग्न व्यक्तिलाई १५ वर्षदेखि जन्मकैदसम्मको सजाय तथा ५ लाखदेखि २५ लाख रुपैयाँसम्म जरिवाना हुने व्यवस्था छ ।
Discussion about this post