बाँके जेठ १५ गते ।
५ जेष्ठ, ०७९ रातको २ः३० बजे बहराइच सलारगन्ज, इदगाह सरिफ, थाना दरगाहका अतिक खान उर्फ विक्की नेपालगन्जस्थित स्टार लाइट होटलको लक्की स्टार क्यासिनो पुगे । क्यासिनो खेल्नका लागि गएका उनले तत्कालै पालो पाए । र, २० हजार रुपैँया मेसिनमा हाले ।
त्यस लगतै क्यासिनोको सुरक्षार्थ खटिएका गार्डले उनलाई बाहिर कसैले बोलाइरहेको भनि खवर गरे । त्यसपछि उनी बाहिर निस्के । बाहिर जाने वित्तिकै सुरेश कुर्मीले नियन्त्रणमा लिएर उनलाई पिट्दै गाडीमा बसाले ।
गाडीमा बसालेपछि उनको कञ्चटमा पेस्तोल तेस्र्याइयो । गोली हानेर मार्ने धम्की दिइयो । ‘गाडीमा रहेका पंकज श्रीवास्तव, आश्विनी सिंह, सुरेश कुर्मी र अनुराग शाहले गोली हानेर मार्ने धम्की दिए । कसैले यहाँ होइन राप्ती नदीमा लगेर गोली हान्ने र उतै फाल्ने चेतावनी दिए,’ विक्कीले भने ।
उनले उक्त समुहले आपूmसँग भएको पाँच लाख लुटेर लगेको बताए । उनले पंकजको समुहले चार वटा सुनको सिँक्रि पनि लुटेर लगेको आरोप लगाएका छन् । ‘अपहरण गरेर होटलबाट लगेपछि बाच्ने आशा मरिसकेको थियो । जिन्दगी यहिसम्म रहेछ भनेर बच्चा र पत्नीलाई सम्झिए,’ उनले भने ।
पंकजको समुहले आफूलाई राप्ती नदी पुर्याएर फर्काएको बताए । ‘त्यहाँबाट ल्याएर सिधै वडा प्रहरी कार्यालयमा लगेर राखे । २५ दिनसम्म थुनामा राख्ने धम्की दिए ।
स्वास्थ्य परीक्षणका लागि अस्पताल लैजान प्रहरीलाई उनीहरुले निर्देशन दिए,’ विक्कीले भने ।
अपहरण गरि लगेपछि उनको खुट्टामा चप्पल पनि थिएन । विहान वडा प्रहरी कार्यालयका इन्चार्जले आफ्नो चप्पल दिए । र, जिल्ला प्रहरी कार्यालय लैजान प्रहरी जवानलाई निर्देशन दिए ।
‘जिल्ला प्रहरी कार्यालयको एकतला माथिको कोठामा दुई जना प्रहरी थिए । सोही कोठाको सोफामा पंकज, आश्विनी, सुरेश र अनुराग बसेको देख्ना म डराएँ । मलाई अपहरण गर्नेहरु प्रहरी कार्यालयमा निर्धक्कसाथ बसेको देख्दा झस्किएँ,’ उनले भने ।
पंकज र विक्कीको दुश्मनी पुरानो हो ।
सन् २०१४ मा भारतमा विद्यायकको निर्वाचनको प्रचार प्रसार चलिरहेको थियो । पंकज र विक्की फरक पार्टीका प्रचारक थिए । त्यहिबेला दुई पक्ष वीच विवाद भयो । विवादमा धरपकड भयो । त्यसको रिस पंकजलाई थियो । त्यहि रिसइवीका कारण पंकजको समुहले विक्कीमाथि गोली प्रहार गर्यो । पेटमा गोली लागेपछि उनी लखनऊस्थित ट्रमा सेन्टरमा भर्ना भए । उनको पेटमा ११ वटा टाँका लागेको छ ।
सोही घटनामा संलग्न भएको आरोपमा पंकज पक्राउ परे, तर केहि महिनापछि थुना मुक्त भए । ‘पंकजको समुहले हानेको गोली अझैँ पेटमा छ,’ उनले भने ।
पंकज र विक्कीको भेट लामो समय भएन । एकदिन एक रेष्टुरेन्टमा जम्काभेट भयो, तर बोलचाल भएन । ‘उसको र मेरो देखादेखमात्र भयो । केहि नबोलेर म फर्किएँ,’ उनले भने ।
पंकजको घर भारतको लखनऊ क्षेत्रमा भएको विक्कीलाई लागेको थियो । त्यसैले उनलाई उनका परिवारले लखनऊ बस्न दिएनन् । उनी नेपालगन्जमा कोठा भाडा लिएर बस्दै आएका छन् । उनको साथमा एक छोरा र पत्नी छिन् । ‘म नेपालगन्ज बस्न थालेको जानकारी पंकजले पाएछन् । मेरो नम्बर पत्ता लगाएर विच–विचमा मलाई फोन गरेर धम्की दिन्थे । म भारत गएको बेला ह्वाट्सपमा फोन गरेर पंकजले मलाई त्रसाउँथे,’ विक्कीले भने ।
उनले अपहरण गरि हत्या प्रयास गरेको भन्दै चार जनाको नाममा जिल्ला प्रहरी कार्यालयमा किटानी जाहेरी दिएका छन् । तर, घटना भएको १० दिन वित्दासमेत उनीहरुलाई प्रहरीले पक्राउ नगर्दा न्याय नपाउने होकी भन्ने चिन्ता छ । ‘नेपाल प्रहरीले मलाई न्याय दिन्छ भन्ने पूर्ण आशा छ, तर आरोपितहरु खुलेआम हिड्दा शंका उब्जिएको छ,’ उनले भने ।
जिल्ला प्रहरी कार्यालय बाँकेले विक्कीले दिएको उजुरी दर्ता भइसकेको जनाएको छ । उजुरी दर्ता भएर अनुसन्धान सुरु भइसकेको छ । किटानी जाहेरीको आधारमा आरोपितलाई पक्राउ गरि बयान लिइने छ,’ बाँकेका प्रहरी प्रवक्ता डिएसपी मधुसुदन न्यौपानेले भने ।
Discussion about this post