बाँके, असोज २७ गते ।
नेपालगन्जका सडक, चोक तथा गल्लीमा सामुदायिक कुकुरको सङ्ख्या बढ्दै जाँदा स्थानीयवासी त्रसित बनेका छन्। कुकुरले पैदलयात्रीलाई लखेट्ने, सवारीसाधनको पछाडि दौडिने र अचानक झम्टिने गर्दा दुर्घटनाको जोखिम बढेको छ।
नेपालगन्ज–११, ईदगाह रोडका गयास सिद्दिकी कुकुर झम्टिँदा स्कुटरबाट खसेर घाइते भएको बताउँछन्। नेपालगन्ज–२, बागेश्वरी टोलका मुन्ना पोरवालका अनुसार साँझ र राति कुकुरको समूहका कारण सडकमा हिँड्नसमेत समस्या हुने गरेको छ। सडकबत्तीको अभावले जोखिम थप बढाएको छ।
नागरिक सरोकार मञ्च बाँकेका संयोजक कृष्णप्रसाद श्रेष्ठले बालबालिका, ज्येष्ठ नागरिक तथा दुईपाङ्ग्रे सवारीसाधन प्रयोगकर्ता बढी जोखिममा रहेको बताए। कुकुरको समूहले अचानक झम्टिँदा दुर्घटना हुने सम्भावना बढेको उनको भनाइ छ।
नेपालगन्ज उपमहानगरपालिकाका प्रमुख प्रशान्त विष्टका अनुसार गत जेठमा चार दिनसम्म शिविर सञ्चालन गरी २३ वटै वडाका २८१ सामुदायिक कुकुरको बन्ध्याकरण तथा रेबिजविरुद्धको खोप लगाइएको थियो। तर, सडकमा कुकुरको समस्या भने कायमै छ।
भेरी अस्पताल, नेपालगन्जमा आर्थिक वर्ष २०८२/८३ मा जनावरको टोकाइका आठ हजार ४०४ घटना अभिलेख भएका छन्। कुकुरको सङ्ख्या बढेसँगै टोकाइपछि रेबिजविरुद्धको खोप लगाउन अस्पताल पुग्नेको सङ्ख्या पनि बढेको छ।
सरोकारवालाहरूले कुकुरको बन्ध्याकरणसँगै नियमित अनुगमन, रेबिजविरुद्धको खोप, नयाँ जन्मिएका कुकुरको व्यवस्थापन र फोहोर नियन्त्रणलाई प्रभावकारी बनाउनुपर्ने बताएका छन्। सडकमा कुकुरको समस्या समाधान गर्न दीर्घकालीन योजना आवश्यक रहेको उनीहरूको भनाइ छ।
Discussion about this post