बाँके भदौ २९ गते ।
भेरी अस्पताल नेपालगन्जमा डेंगुका १९ जना बिरामी भर्ना भएका छन् ।
बाँकेमा हालसम्म नेपालगन्ज उपमहानगरपालिकका ५, कोहलपुर नगरपालिकाका २ र बैजनाथ गाउँपालिकाका १ गरी ८ जना र बाहिरका ११ जना डेंगुका बिरामी उपचाररत रहेको भेरी अस्पताल नेपालगन्जका मेडिकल सुपरीटेन्डेन्ट डा. बद्री चापागाईंले जानकारी दिनुभयो ।
उहाँका अनुसार बाँकेबाहेक दाङ, बर्दिया र कर्णाली प्रदेशका डेंगु संक्रमित उपचारमा भेरी आएका हुन् । बाँकेमा देखिएका डेंगुका एक बिरामी नेपालगन्ज उपमहानगरपालिका ४ बसपार्कका हुन् भने ७ जना काठमाडौं, चितवन र बुटवलबाट प्रभावित भएर आएका हुन् । बसपार्क क्षेत्रमा एक जनामा डेंगु देखिएपछि लामखुट्टेको लार्भा नष्ट गर्ने अभियान सञ्चालन गरिएको छ ।
बसपार्कका गाडीका टायर, प्लास्टिक बट्टा र खाल्डाखुल्डीमा जमेको पानीमा रहेका लार्भा नष्ट गरिरहेको नेपालगन्ज उपमहानगरपालिकाका स्वास्थ्य शाखा प्रमुख रामबहादुर चन्दले जनाए ।
त्यसबाहेक नेपालगन्ज उपमहानगरपालिकाले वडा–वडामा सचेतना र सरसफाई अभियान संचालन गरिएको छ । नेपालगन्जका स्थानीयहरुको घरभित्र डेंगु संक्रमित लामखुट्टेको लाभ्रा भेटिएको छ ।
स्थानीयहरुको घरमा राखिएको गमला, खानेपानी ट्यांकी, पानी राख्ने ड्रम, टीन र प्लास्टिकको खाली बट्टा, टायर, सिसी र कन्टेनरमा डेंगु संक्रमित लामखुट्टेको लाभ्रा भेटिएको जनस्वाथ्यकर्मीले जनाएका छन् ।
चिकित्सकहरुका अनुसार डेंगुबाट जोगिन शरीर राम्रोसँग ढाक्ने गरी कपडा लगाउने, गमला, एसी, फ्रिज, कुलरको पानी फेर्ने, खाली डब्बा, टायरमा पानी जम्न नदिने, घरको झ्यालमा जाली लगाउने र सुत्ने समयमा झुल प्रयोग गर्नुपर्छ । स्वास्थ्य कार्यालयले बाँके जिल्लालाई डेंगुको उच्च जोखिममा राख्दै आएको छ । ईकान्तिपुरमा समाचार प्रकाशित छ ।
Discussion about this post