बाँके भदौ १९ गते ।
सशस्त्र प्रहरीको प्रहारबाट आँखा गुमाएका बालकको बिषयलाई लिएर अधिकारकर्मीहरुले जिल्ला प्रशासन कार्यालय र जिल्ला प्रहरी कार्यालय बाँकेमा ध्यानाकर्षण पत्र बुझाएका छन् ।
एक दर्जनबढी अधिकारकर्मीहरुले आज बाँकेका सहायक प्रमुख जिल्ला अधिकारी टोपेन्द्र केसी र बाँकेका एसपी सन्तोष सिंह राठोरलाई घटनाको अनुसन्धान गर्दै दोषीमाथि कारवाहीको माग राख्दै ध्यानाकर्षण पत्र बुझाएका हुन् ।
गएको भदौ १४ गते राती सशस्त्र प्रहरीले नेपालगन्ज चौलिका चोकमा स्थानीयबासी र प्रहरीसँगको झडपमा सशस्त्र प्रहरीको प्रहारबाट नेपालगंज १४ निवासी जैयद हास्मीको आँखा फुटेको थियो । सशस्त्र प्रहरीको बन्दुगको कुन्दाले लागेर बालकको आँखा फुटेको परिवारको भनाइ छ । ’उक्त घटनामा संलग्न सशस्त्र प्रहरीलाई अहिलेसम्म कारवाही हुन सकेको छैन । अधिकारकर्मीहरुले घटनाको निन्दा गर्दै दोषीमाथि छानविन गर्न र कारवाही गर्न माग गरेका छन् । घइते बालकको फत्तेबाल आँखा अस्पताल नेपालगंजमा उपचार भैरहेको छ ।
पिडित बालक हास्मीको बयान अनुसार आफु राती चोलिका नजिक ठेलामा माछा खाने क्रममा सशस्त्र ३० न. गण द्वारा खटिएको प्रहरी टोलीले तस्करको संज्ञा दिई राइफलको कुन्दाले हान्दा सो बालकको आँखा फुटेको हो । जनसेवामा खटिएका प्रहरीहरुद्वारा नै निर्दोष बालक माथि गम्भीर कुटपिट हुनु दुखद र चिन्ताजनक विषय हुनुका साथै बालअधिकार, मानवअधिकारको ठाडो उलंघन समेत भएको हामी बालअधिकारकर्मीहरुको साझा ठहर रहेको छ’ अधिकारकर्मीहरुको धयानाकर्षण पत्रमा भनिएको छ ।
तर सो घटना बारे राज्य र सरोकारवाला निकायको हाल सम्म कुनै पनि किसिमको चासो नदेखिएको प्रति आपत्ती व्यक्त गरिएको छ । ’यसरी निर्दोष बालक माथि भएको कुटपिट प्रति घोर निन्दा तथा भर्त्सना गर्दै सो समयमा खटिएको प्रहरी टोली माथि गम्भीर अनुसन्धान गरी बालकलाई न्याय र पीडक लाई कानुन बमोजिम कडा कारवाहीको समेत माग गर्दछौं’ ध्यानाकर्षण् पत्रमा उल्लेख छ । घटनाबारे छानविन गरी दोषीलाई कारवाही नगरिएका कडा आनदोलनको चेतावनी दिइएको छ । ’बालबालिका माथि कुनै पनि किसिमको कुटपिट हाम्रो लाई असहय मात्र होईन यो देशको संविधान तथा कानुनको बर्खिलाफ समेत हो ।
तसर्थ माथि उल्लेखित विषय लाई अबिलम्ब अनुसन्धानको दायरामा ल्याई दोषी उपर कारवाही प्रक्रिया अगाडी बढाई पिडित बालक लाई उचित न्याय र क्षतिपूर्तिको व्यवस्था मिलाउन सादर अनुरोध गर्दछौ । अन्यथा हामी कडा भन्दा कडा न्यायिक आन्दोलन गर्ने चेतावनी समेत दिन चाहन्छौ’ध्यानाकर्षण पत्रमा भनिएको छ । बालअधिकारकर्मीहरु साहिल अन्सारी, अञ्जना चतुर्वेदी, श्वेता गुरुङ , सलमान सल्मानी, शहाबुद्दिन हलवाई, अंकित मिश्रा, अभियन्ता डा. निनोद कर्ण, सामाजिक अभियन्ता समिर अली बेहना र प्रकाश कुँवरद्धारा हस्ताक्षर सहितको ध्यानाकर्णण पत्र गृह प्रशासनलाई बुझाइएको छ ।
यो पनि पढ्नुस
१४ वर्षीय जैयदको अनाहकमा आँखा गुम्यो, सशस्त्र विरुद्ध मुद्धा दर्ताको तयारी
Discussion about this post