बाँके मंसिर १३ गते ।
नेपालगन्जमा राष्ट्रियस्तरको ब्याडमिन्टन प्रतियोगिता आयोजना गरिने भएको छ । बाँके जिल्ला ब्याडमिन्टन संघको आयोजनामा आगामी फागुनको अन्तिम साता राष्ट्रियस्तरको ब्याडमिन्टन प्रतियोगिता हुने भएको हो ।
ब्याडमिन्टन खेलको स्तर उन्नती तथा खेलाडीको विकास गर्ने उद्देश्यका साथ नेपालगन्जमा राष्ट्रियस्तरको ब्याडमिन्टन प्रतियोगिता गर्न थालिएको बाँके जिल्ला ब्याडमिन्टन संघले जनाएको छ । संघका अध्यक्ष संजय थापाले प्रतियोगितामा देशभरबाट बिभागिय सहित उत्कृष्ट खेलाडीहरु सहभागी हुने जानकारी दिए ।
उनले मेन्स डबल्स (खुल्ला), मेन्स डबल्स (बि लेभल) र भेट्रान्स (४५ प्लस) गरि ३ ईभेन्टमा प्रतियोगिता हुने बताए । अध्यक्ष थापाका अनुसार प्रतियोगितामा मेन्स डबल्स (खुल्ला) को उपाधि विजेतालाई एक लाख रुपियाँ पुरस्कार सहित कप, मेडल, प्रमाणपत्रबाट पुरस्कृत गरिनेछ भने दोस्रो टिमले नगद ७० हजार तथा तृतिय टिमले ३० हजार रुपियाँ, मेडल, प्रमाणपत्र पाउने छन् ।
यसैगरि मेन्स डबल्स बि लेभलको पहिलो, दोस्रो र तेस्रो टिमहरुले क्रमशः ४० हजार, ३० हजार र १० हजार रुपियाँ तथा भेट्रान्सतर्फ पहिलो, दोस्रो र तेस्रो टिमले क्रमशः ५० हजार, ३० हजार र १० हजार रुपियाँ पुरस्कारसँगै कप, प्रमाणपत्र र मेडल प्रदान गरिने बाँके जिल्ला ब्याडमिन्टन संघले जनाएको छ । ३ दिनसम्म संचालन हुने प्रतियोगिता नेपालगन्ज रंगशालाको कर्भड हलमा आयोजना गरिने छ ।
Discussion about this post