बाँके, कात्तिक २२ गते ।
कर्णाली प्रदेशको राजधानी सुर्खेतमा आयोजना हुने १०औँ राष्ट्रिय खेलकुद प्रतियोगिताका लागि लुम्बिनी प्रदेशबाट पौडीका २० खेलाडी छनोट भएका छन् ।
नेपालगन्ज रंगशाला परिसरमा भएको छनोट प्रतियोगितामा सहभागी २० पुरुष र ११ महिला खेलाडीमध्ये १२ पुरुष र आठ महिला खेलाडी छनोट भएका हुन् ।
पौडी प्रशिक्षक चन्द्रराम चौधरीका अनुसार पुरुषतर्फ अमित रावल, प्रत्युज जोशी, सुशान्त बोहोरा, संस्कार न्यौपाने, रामबहादुर थारू, विशेष प्रचण्ड सिंह, अनन्त प्याकुरेल, ओम भण्डारी, इभान्सु भट्टराई, राघव खत्री, सुमिक वाग्ले र अध्ययन भण्डारी छनोट भएका छन् ।
त्यस्तै, महिलातर्फ जिज्ञासा भुसाल, संस्थिता गिरी, समृद्धि न्यौपाने, श्रीजा रेग्मी, स्मारिका आचार्य, ईभा भट्टराई, कृतिका वाग्ले र नित्याश्री दहित छनोट भएका छन् ।
छनोट भएका अधिकांश खेलाडी बाँके जिल्लाका रहेको चौधरीले बताए । उनका अनुसार विगतमा नेपालगन्जको स्प्रिङ डेल एकेडेमीका धेरै खेलाडी छनोट हुने गरेकामा यसपटक कोहलपुरको शिखा एकेडेमीका खेलाडी बढी छनोट भएका छन् ।
१०औँ राष्ट्रिय खेलकुद प्रतियोगिताअन्तर्गत पौडीका खेल नेपालगन्ज रंगशाला परिसरमा रहेको पौडी पोखरीमा सञ्चालन हुने तय भएको छ । साबिक मध्यपश्चिम खेलकुद विकास समितिका प्रमुख महेश चन्दले पौडी प्रतियोगिता नेपालगन्जमै सञ्चालन गरिने बताए ।
Discussion about this post