बाँके पुस १९ गते ।
फितलो प्रहरी प्रशासन र खुला सीमा नाकाको फाइदा उठाउँदै तस्करहरुले बाँकेका खुला सीमानाकाबाट अवैध तस्करलाई तीब्र पारेका छन् । पछिल्ल्लो समय साईगाउँ सिमानाका हुँदै तस्करी बढेको प्रत्यक्षदर्शी बताउँछ । सशस्त्र र नेपाल प्रहरीसँगको मिलोमतोमा तस्करले साईगाउँ क्षेत्रबाट निर्वाध रुपमा अवैध समान ओसार पसार गरेको प्रत्यक्षदर्शी बताउँछन् ।
राजस्व चुहावट नियन्त्रणका लागि खटिएका सशस्त्र प्रहरी र नेपाल प्रहरीको मिलोमतोमा भएकै कारण त्यस क्षेत्रबाट तस्करी मौलाएको स्थानीय बताउँछन् । तस्करी नियन्त्रणका लागि खटिएका सुरक्षाकर्मीले तस्करसँग मोटो रकम लिएर तस्करीमा सघाएपछि राज्यको करोडौं राजस्व गुमिरहेको सीमा क्षेत्रका बासिन्दाको भनाई छ ।
भारतबाट आउने माछालाई चेकजाँच गरेर मात्रै नेपाल भित्रिन दिने व्यवस्था छ, तर साईगाउँ सीमा नाकाबाट दैनिक लाखौँका अवैध माछा नेपाल भित्रिरहेका छन् । तस्करहरुले भारतीय कपडा, हार्डवेर, टायल, खाद्यवस्तु, चिनी, दाल, तरकारी, बोइलर कुखुरा , काटेको मासु, नेपालमा प्रतिवन्धित मंगुर माछा खुलेयाम नेपाल त्रित्र्याइरहेको स्थानीयले बताए ।
साईगाउँबाट तस्करहरुले भारतबाट अवैध भन्सार छलीको सामान साईगाउँमा भण्डारण गर्ने र दिउँसो र रातीको समयमा नेपालगञ्ज बजार ल्याउने गरेका छन् । जयसपुर बीओपी, बढैया बिओपी र नेपाल प्रहरीलाई लाइन दिएर तस्करहरुले रातारात भारतबाट अवैध सामानहरु भित्र्याउने गरेका छन् । एकजना स्थानीयले नाम नखोल्ने सर्तमा भने, ‘तस्करहरुले साईगाउँ नाकाबाट दैनिक ५० लाख भन्दा बढीको सामान भित्र्याउँछन् । नाकामा खटिएका सुरक्षाकर्मी देखेर पनि नदेखे झैँ गर्छन् ।’ ति स्थानीयका अनुसार त्यहाँ तस्कर र प्रहरी छुट्टाउनु नै गाह्रो हुने गरेको छ ।
तस्करहरुले रातिको १२ बजेदेखि विहानको ३ बजेसम्म सामान भित्राउने गरेको साईगाउँ सीमा क्षेत्रका स्थानीयको आरोप छ । माथिल्लो निकायलाई महिनावारी र तल्लो दर्जालाई सामानको अवस्था र मूल्य हेरेर पाँच सयदेखि एक हजार रुपैयाँसम्म लाइन दिने गरेको तस्करहरुको भनाई छ । तस्करहरुले रातीको समयमा ठुलो परिमाणमा भन्सार छली गरेर साईगाउँमा भण्डारण गर्ने र पछि एकमुष्ठ नेपालगञ्ज बजार ल्याउने गरेका छन् ।
साईगाउँमा भण्डारण गरेको समान रातीको समयमा पिकअप, मोटरसाइकल, साईकल अटोमा नेपालगञ्ज ल्याउने गरेको तस्कर स्वयम बताउँछन् । घुमुवा प्रहरीले मासिक एकजना तस्करबाट २५ हजार रुपैयाँ उठाउने गरेको प्रमाण फेला परेको छ ।
सशस्त्र प्रहरी र नेपाल प्रहरीले नेपालगन्जस्थित जमुनाह नाकामा कडाई गरेर विभिन्न सहायक नाकाबाट सामान भित्र्याउन सहयोग गरिरहेको छ । जसमा तस्कर र सुरक्षाकर्मीलाई फाइदा भएको छ । साईगाउँबाट तस्कर नाइके संजय, कल्लु, जाबिर, मकबुल, नसरुद्दिन लगायतले अवैध सामान भित्र्याउने गरेको स्थानीय बताउँछन् । उनीहरु प्रहरीलाई लाईन मिलाएर तस्करी गर्दै आएका छन् । तस्करहरुले चौकी इन्चार्जलाई घुमुवा मार्फत लाईन दिने गरेको स्रोत बताउँछ ।
घुमुवा नरेश चौधरीले एसपीको नाम भजाएर असुली धन्दा चलाईरहेका छन् । चौकी इन्चार्जले घुमुवा खटाउँन नपाइने ब्यवस्था छ । आवश्यक परेमा घुमुवा खटाउनलाई माथिल्लो निकायको आदेश लिनुपर्छ । तर, साइगाउँमा यसको ठिक विपरीत घुमुवा खटाएर असुलीधन्दा मच्चाउने काम भइरहेको स्थानीयको भनाई छ ।
तस्करहरुले साइगाउँ चौकीलाई मासिक साढे ३ लाख रुपैयाँसम्म महिनावारी बुझाउने गरेका छन् । यहाँ जुवाखालबाट समेत प्रहरीले रकम असुल्ने गरेको छ । बाँकेका प्रहरी प्रमुख एसपी सुभाषचन्द्र बोहराले तस्करलाई सहयोग नगर्न र तस्करसँग रकम लिएको पाइए कडा कारवाही गर्ने मातहतका प्रहरीलाई निर्देशन दिएका छन् ।
उनले मातहतका प्रहरीलाई घुस नखान र खानेलाई कारवाहीको दायरामा ल्याउन निर्देशन दिए पनि त्यसको कार्यान्वयन हुन सकेको छैन । नेपाल–भारत सीमा अन्तरगत बाँकेको जमुनाह, जयसपुर पचपोखरा, साईगाउँ, खडैचा, हिरमिनिया कालाबन्जार, भज्जुपुरुवा, नयाँ वस्ती, बढैया, सैनिक लगायतका सहायक नाका चोरी तस्करीका लागि प्रमुख सहायक नाका मानिन्छन् ।
Discussion about this post