बर्दिया माघ ९ गते ।
बाघ अवलोकनका लागि नेपालकै प्रमुख मानिने बर्दिया राष्ट्रिय निकुञ्जमा आन्तरिक तथा बाह्य पर्यटकको आगमनमा ह्वात्तै वृद्धि भएको छ । बर्दिया राष्ट्रिय निकुञ्जले दिएको जानकारी अनुसार आर्थिक वर्ष २०८०–८१ को ६ महिनामा नेपाली र विदेशीसहित १४ हजार ६५८ जनाले निकुञ्ज अवलोकन गरेका छन् । यही अवधिमा गत वर्ष नौ हजार ६९३ जनाले मात्र निकुञ्ज अवलोकन गरेका थिए ।
गत वर्षको तुलनामा यो वर्ष पाँच हजार भन्दा बढी पर्यटक आएकोले बर्दियाका पर्यटन व्यवसायी उत्साहित भएको बर्दिया राष्ट्रिय निकुञ्जका प्रमुख डा. अशोक कुमार रामले बताए उनका अनुसार चालु आर्थिक वर्षको पुस मसान्तसम्म आन्तरिक पर्यटक ११ हजार ३९, सार्क देशका ७६०, तेस्रो देशका दुई हजार ८५९ जना पर्यटकले बर्दिया राष्ट्रिय निकुञ्जको अवलोकन गरेका छन् । यही ६ महिनाको अवधिमा गत आर्थिक वर्षमा ६ हजार ५४१ आन्तरिक, ५०१ सार्क देशका र तेस्रो देशका दुई हजार ६५१ गरेर जम्मा ९ हजार ६९३ जना पर्यटक भित्रिएका थिए ।
गत वर्षभन्दा यसपटक सार्क र तेस्रो देशका पर्यटकको संख्यामा थोरै वृद्धि भएपनि आन्तरिक पर्यटकको संख्यामा भने करिब दोब्बरले वृद्धि भएको निकुञ्जले जनाएको छ । बर्दिया राष्ट्रिय निकुञ्ज बाघ अवलोकन र संरक्षणका लागि प्रख्यात छ । पूर्णतया तराई क्षेत्रमा रहेको यस राष्ट्रिय निकुञ्ज स्थापनाको प्रमुख उद्देश्य नै बाघको संरक्षण भएपनि हात्ती, गैँडा, बाह्रसिंगा, घडियाल गोही, डल्फिन जस्ता लोपोन्मुख वन्यजन्तुहरू यहाँ संरक्षित रहेको निकुञ्जका प्रमुख रामले बताए । उनले बाघ लगायत बर्दिया निकुञ्जमा तिनै लोपोन्मुख वन्यजन्तु हेर्न धेरै टाढा टाढाबाट आन्तरिक र विदेशी पर्यटक पुग्ने गरेको बताए ।
बर्दिया राष्ट्रिय निकुञ्जको मुख्य कार्यालय रहेको ठाकुरद्धाराका पर्यटन व्यवसायी होटल सञ्चालक मोहन चौधरीले पर्यटकको संख्या बढ्दै गएकोले उत्साहित बनाएको बताए । उनका अनुसार विशेषगरी धेरै पर्यटकहरू बर्दियामा बाघ हेर्न नै आउने गरेको र बाघ देखेरै फर्किने गरेकोले बाघ हेर्न कहिलेकाँही केही समय लाग्ने हुँदा होटल व्यवसायीलाई लाभ हुने गरेको बताए । पर्यटन प्रवर्द्धन मञ्च बाँकेका संयोजक कृष्ण प्रसाद श्रेष्ठले बर्दिया निकुञ्जमा आने पर्यटक संख्या बढ्नु र बाँके निकुञ्जमा पर्यटकका लागि विभिन्न व्यवस्था गरिनुले बाँके बर्दियाको आर्थिक विकासमा ठुलो टेवा पुग्ने बताए ।
उनले भारतका ठुला ठुला सहरहरुसंग विभिन्न यातायात मार्फत बाँकेको सिधा सम्पर्क हुन थालेकोले भारतीय पर्यटक तान्ने राम्रो अवसर रहेको हुँदा सो अभियानमा सबै लाग्नु पर्ने बताए । पश्चिम नेपालको बाँके र बर्दिया जिल्ला पर्यटनका हिसाबले महत्वपूर्ण जिल्ला मानिन्छन् । बाँकेलाई पर्यटक आगमनको मुख्य ट्रान्जिट बनाएर बर्दिया लगायत कर्णालीको रारा, प्युठानको स्वर्गद्धारीसम्म पर्यटक पठाउन सकिए यहाँको होटल व्यवसाय र यातायात व्यवसाय फस्टाउने निश्चित छ ।
Discussion about this post