सुर्खेत फगुन ८ गते ।
कर्णाली प्रदेशमा खाद्य व्यवस्था तथा व्यापार कम्पनीका डिपोहरूमा चामल नहुँदा रित्ता भएका छन् । चामलको अभावमा डिपो, बिक्री केन्द्र रित्तै भएको लामो समय भए पनि अहिलेसम्म चामल पुग्न सकेको छैन ।
खाद्य व्यवस्था तथा व्यापार कम्पनी लिमिटेडले चामल खरिद गर्नका लागि दुई पटक बोलपत्र गरे पनि उक्त बोलपत्रअनुसार कसैले ठेक्का नलिँदा चामल अभाव भएको कम्पनीका कर्णाली प्रदेश प्रमुख माधव मिश्रले जानकारी दिए । कर्णालीमा सबैभन्दा बढी अरुवा मोटा चामल माग भए पनि सो चामलको अभाव भएको प्रमुख मिश्रले जानकारी दिए ।
महँगो रकम पर्ने स्टिम जिरा मसिनो चामल केही मात्रामा भए पनि उक्त चामल बिक्री नहुने भएकाले अरुवा मोटा चामल नै सबैभन्दा बढी माग हुने गरेको छ । जिल्ला सदरमुकाममा रहेका कारागार शाखामा समेत उक्त चामल प्रयोग हुने भए पनि उक्त चामल नहुँदा दिन नसक्ने अवस्थामा पुगेको प्रमुख मिश्रले बताए ।
महँगोमा खरिद गरेर सस्तोमा कसरी दिने भन्ने समस्या भएको उनको भनाइ छ । भूकम्पबाट भारी मात्रामा प्रभावित जाजरकोटका चार बिक्री केन्द्र र चार डिपो चामलको अभावमा रित्तो अवस्थामा रहेको जिल्ला कार्यालयका प्रमुख रामप्रसाद पौडेलले जानकारी दिए । मसिनो चामल थोरै भएको त्यो पनि प्रतिकेजी ९२ मा बिक्री भएकाले सो चामल स्थानीयबासीले नरुचाएको उनले बताए । जाजरकोटमा अरुवा मोटा चामल ५४ रुपैयाँमा पाइने भएकाले माग भारी मात्रामा रहेको उनको भनाइ छ ।
भूकम्पका कारण घरबास उठीबास भएर अस्थायी टहरामा बसिरहेका पीडितहरू दैनिक चामल लिन आए पनि डिपोमा चामल नहुँदा रित्तो हात फर्कनुपर्ने बाध्यता सिर्जना भएको उनको भनाइ छ । बजारमा चामल किन्दा भारी मात्रामा महँगो छ, खाद्यमा जाँदा चामल नै छैन ? हामीलाई बहुत समस्या भएको बारेकोट गाउँपालिका–५ का प्रेम शाहीले जानकारी दिए ।
जति महँगो भए पनि बजारकै चामल ल्याएर प्रयोग गर्नुपर्ने बाध्यता रहेको गुनासो उनले सुनाए । चामल नभएपछि अधिकांश ठाउँमा रहेका गोदाममा ताल्चा लगाएको अवस्था छ । सदरमुकाम बाहिर रहेका डिपो तथा बिक्री केन्द्रमा कर्मचारी नबस्ने र चामल आएमा ठेकेदारले आफै बिक्री गर्दै आएका छन् । कर्मचारी अभावका कारण ढुवानीकर्ताले नै चामल बिक्री गर्ने अवस्था रहेको छ । कर्णालीका जाजरकोट, डोल्पा, हुम्ला, कालिकोट, मुगु र जुम्ला जिल्लामा खाद्यान्न अभाव भएको हो ।
Discussion about this post