बाँके फागुन १६ गते ।
नेपालगन्ज उपमहानगरपालिकाको कार्यालयमा मंगलवार भएको घटनालाई अतिरञ्जित नगर्न नेपालगन्ज उपमहानगरपालिका ५ का वडा अध्यक्ष सराफत हुसेन शेषले आग्रह गरेका छन् । उनले कर्मचारीको लापरवाहीले विनियोजित बजेटबाट विकास, निर्माणको काम नभएको भन्दै उपमहानगरपालिकाको कार्यालयमा गएको बताए ।
विनियोजित बजेटबाट निर्माण हुने सडक, नाली लगायतका भौतिक संरचना निर्माणका लागि दुई महिनासम्म उपमहानगरको कार्यालयमा गएको स्पष्ट पार्दै अध्यक्ष शेषले कर्मचारीमाथि कुनै अभद्र ब्यवहार नगरेको बताए । ‘जनताको काममा किन ढिलाई भएको हो । काम के कारणले रोकिएको हो भन्ने बारे बुझ्न उपमहानगरको कार्यालयमा गएको हुँ । कर्मचारी र जनप्रतिनिधिलाई मैले कुनै गालीगलौच र अपशब्द प्रयोग गरेको छैन,’ उनले भने, ‘मेरो बारेमा भ्रम सिर्जना गरि अतिरञ्जित बनाउन खोजिएको मात्र हो । यसलाई अन्यथा नलिन म आग्रह गर्दछु ।’
उनले उपमहानगरको कार्यालयमा गएर सुशासन, ढिलासुस्तीको बारेमा आवाज उठाएको दावी गरे । उनले आफ्नो ब्यक्तिगत कामका लागि नभई जनताको काममा प्रतिवद्ध रहेको बताए । प्रक्रिया पुग्दासमेत कर्मचारीहरुले काम रोकेपछि आक्रोशमा आएको बताउँदै उनले जनताका लागि जस्तोसुकै परिस्थितिसँग लड्न तयार रहेको स्पष्ट पारेका छन् । ‘काम गर्नका लागि मलाई जनताले चुनेर पठाउनु भएको छ । काम गर्न चाहदा चाहदै मैले काम गर्न पाएको छैन । कर्मचारीहरु विभिन्न बहाना बनाएर काम अगाडी बढाउन दिदैनन् । काम किन अगाडी बढ्दैन भन्ने जानकारी लिएकोमात्र हुँ,’ अध्यक्ष शेषले भने ।
उनले उपमहानगरका कर्मचारी कार्यालय समयभन्दा ढिलागरि कार्यालयमा आउने गरेको बताए ।
कार्यालय समयमा आफू पुग्दा कर्मचारी नदेखेको उनको भनाई छ । ‘कर्मचारीहरु समयमा कार्यालयमा किन आउँदैनन् ? काम किन गर्दैनन् ? ढिलासुस्ती किन हुन्छ ? भनेर जानकारी लिन मैले नपाउने हो र ? जनप्रतिनिधि भएर सुशासन, पारदर्शीताको कुरा गर्दा अपराध हुन्छ र ?’ उनले भने, ‘जनप्रतिनिधिको हैसियतले मैले कर्मचारीसँग कुरा गरेको हुँ । कर्मचारीको ब्यवहार देखेर रिस उठे पनि मैले होसहवासमा बोलेको हुँ । कसैलाई गालीगलौच र अपशब्द प्रयोग गरेको स्पष्ट पार्न चाहन्छु ।’
उता, कर्मचारीले वडा अध्यक्ष सराफत हुसेन शेषले कर्मचारीमाथि दुब्र्यवहार गरेको भन्दै अतिआवश्यक काम बाहेक सम्पूर्ण कामकाज ठप्प पारेका छन् । कर्मचारीहरुले अध्यक्ष शेषको कार्यशैली प्रति विरोध जनाउँदै बुधवार कामकाज ठप्प पारे । उनीहरुले विज्ञप्ती जारी गरि वडा अध्यक्ष शेषले कार्यालयमा आएर अपशब्द प्रयोग गर्दै कर्मचारीमाथि दुब्र्यवहार गरेको जनाएका छन् ।
Discussion about this post