बर्दिया चैत ७ गते ।
बर्दिया जिल्लाको ठाकुरबाबा नगरपालिकाले करारका कर्मचारीलाई चैतदेखि हाजिर गर्नबाट रोक लगाएको छ । विगत ८ वर्षदेखि नगरपालिकामा मेलमिलापकर्ताका रूपमा कार्यरत राधा आचार्यलाई मेयर र उपमेयरले फरक पार्टी भएको कारण चैत १ गतेबाट काम गर्नबाट रोक लगाएका हुन् ।
ठाकुरबाबा नगरपालिकामा मेयर तिलकराम लम्साल नेपाली कांग्रेस र उपमेयर विना कुमारी भट्टराई एमालेका हुन् । हाजिर हुनबाट रोकिएकी कर्मचारी राधा भने माओवादी केन्द्रको नगरकमिटी अध्यक्ष नेत्रराज आचार्यकी पत्नी हुन् । आचार्य स्थानीय तह निर्वाचनमा उम्मेदवार समेत बनेका थिए । २०७२ सालदेखि कार्यरत राधाले पछिल्लो समय नगरपालिकाले पूर्वााग्रह राखेर विभिन्न बहानामा आफूलाई दुःख दिने गरेको आरोप लगाइन् । उनी तत्कालीन ठाकुरद्वारा गाविसमा मेलमिलापकर्ता नियुक्त भएकी थिइन् ।
२०७४ मा विभिन्न गाउँपालिका मिलेर ठाकुरबाबा नगरपालिका बनेपछि पनि मेलमिलापकर्ताहरूलाई निरन्तरता दिने निर्णय भएको थियो । २०८० साउन २७ गते सम्पूर्ण मेलमिलापकर्ताको करार नवीकरण नगर्ने निर्णय भएपछि राधाले उच्चअदालत नेपालगन्जमा रिट निवेदन दायर गरेकी थिइन् । अदालतको अन्तरिम आदेशपछि उनले २०८१ असार ३० सम्मका लागि करार नवीकरण प्राप्त गरिन् । अदालतले माघ १० गते सो प्रकरणमा आदेश गर्दै उक्त पदमा लोक सेवा आयोगबाट स्थायी नियुक्ति नहुँदासम्म करारका कर्मचारीलाई नहटाउन भनेको छ ।
तर ठाकुरबाबा नगरपरिषदले नै करार नवीकरण नगर्ने निर्णय गरेपछि विवाद सतहमा आएको हो । राधाले आफ्नो श्रीमान् फरक पार्टीका भएको कारण नै राजनीतिक पूर्वाग्रह राखेर आफूलाई दुःख दिने गरिएको बताइन् । उनले अदालतको आदेशलाई समेत उल्लङ्घन गर्दै चैतबाट हाजिरमा रोक लगाएको बताइन् । यसविरुद्ध आफू फेरि अदालतमा जाने उनको भनाइ छ । नगरपालिकाका प्रमुख प्रशासकीय अधिकृत रामहरि रिजालले मन्त्रालयले पठाएको सिलिङमा उक्त पद नभएको जिकिर गरे ।
Discussion about this post