बाँके चैत २६ गते ।
नेपाल–भारत सीमानाकाबाट अवैध रुपमा निकासी र पैठारी मौलाएको छ । राज्यले भारत र नेपालबाट हुने चोरी निकासी नियन्त्रण गर्न सशस्त्र प्रहरी बललाई जिम्मा दिएको छ । अवैध चोरी निकासीलाई नियन्त्रण गर्ने जिम्मा पाएका सशस्त्र प्रहरीका प्रमुखले तस्करसँग मोटो रकम लिन थालेपछि पश्चिम नेपालकै प्रमुख नाका नेपालगन्ज र सहायक नाकाबाट अवैध चोरी पैठारी तीब्र्ररुपमा मौलाएको हो ।
नेपाल–भारत सीमा अन्तरगत विभिन्न स्थानमा सशस्त्र प्रहरी बलको बीओपी पोष्ट छ । अवैध चोरी पैठारी नियन्त्रणका लागि सरकारले ठूलो जत्थासहितको सशस्त्र प्रहरी राखे पनि बाँकेमा भने तस्करी नियन्त्रण हुनुको साटो झन मौलाई रहेको छ । मुख्य नाकामा सर्वसाधारणको सामान नियन्त्रणमा लिने सशस्त्र प्रहरीले तस्करबाट मोटो रकम लिएर छाड्दा तस्करले थप प्रश्य पाइरहेका छन् ।
लाइन दिएका तस्करको सामान अगाडीबाट आउँदा समेत नाकामा खटिएका सशस्त्र प्रहरीका जवान नदेखेझैँ गरि बस्ने गरेको स्थानीय बताउँछन् । ‘लाइन दिएका तस्करको सामान आउँदा नदेखेकोझैँ गर्ने र सर्वसाधारणको सामान खोसेर भन्सार बुझाउने गरेको प्रष्ट देखिन्छ,’ ति स्थानीयले भने । सशस्त्र प्रहरी बल नं. ३० गण हेडक्वार्टर बागेश्वरीका तत्कालिन गणपति रमेश विक्रम शाहीको सिको गर्दै हालका गणपति एसपी विमल डाँगीले पनि मुख्य नाकामा कडाई गरेको नाटक मंचन गर्दै तस्करको सामान दिनदहाडै नेपालगन्ज ल्याउन सहयोग गरिरहेको विशेष स्रोतले जनाएको छ ।
‘हामीले त लाइन दिएका छौँ । सामान जतिखेर भन्यो त्यतिबेला ल्याउन सक्छौँ,’ तस्करका एक जना नाइकेले नाम नखुलाउने शर्तमा अनलाइन खोजखबरसँग भने, ‘सशस्त्र प्रहरीले लाइन लिए जतिबेला पनि सामान ल्याउन सकिन्छ । लाइन दिएपछि हामीलाई बरु सर्वसाधारणको डर हुन्छ, तर सशस्त्र र नेपाल प्रहरीको कुनै डर हुँदैन ।’सशस्त्र प्रहरीले मुख्य नाकामा कडाई गरेको जस्तो गरेर सर्वसाधारणलाई त्रसाउने बाहेक अरु केहि गर्न नसकेको प्रत्यक्षदर्शी स्थानीय बताउँछन् । हात्तीको देखाउने दाँत जस्तै ब्यवहार मुख्य नाकामा सशस्त्रले देखाउने गरेको भन्दै ती प्रत्यक्षदर्शी भन्छन्, ‘बेलैमा ब्यवहार नसुधारे एक दिन सशस्त्र प्रहरी पनि जन्जालमा फस्ने पक्का छ ।’
सशस्त्र प्रहरीले लाइन दिएर ल्याएको अवैध सामान नेपाल प्रहरीले नेपालगन्जका विभिन्न स्थानबाट बरामद गर्दै आएको छ । अस्थायी प्रहरी पोष्ट बसपार्कले एक महिनामा ५ लाख मुल्य बराबरको अवैध सामान बरामद गरि जिल्ला प्रहरी कार्यालय बाँकेलाई बुझाएको छ । वडा प्रहरी कार्यालय नेपालगन्जको टोलीले पटक पटक अवैध सामान बरामद गर्दै आएको छ । वडा प्रहरी कार्यालय नपालन्जले पछिल्लो एक महिनामा झण्डै १० लाखको अवैध सामान बरामद गरि भन्सार कार्यालयलाई बुझाएको छ । यी त नेपाल प्रहरीले बरामद गरेका अवैध सामान हुन् । अधिकांश अवैध सामान प्रहरीले सूचना नपाउँदा बाहिर जाने गरेको छ । नाकाबाट हुने अवैध चोरी निकासी नियन्त्रण गर्न बसेको सशस्त्र प्रहरी नै तस्करसँग मिलेर सामान भित्र्याउने मतियार बन्दा तस्करी रोकिनुको साटो दिनदिनै बढ्दै गएको छ । ‘सशस्त्र प्रहरी रक्षक नै भक्षक भएको छ,’ स्थानीय सर्वसाधारणले भने ।
नेपालबाट कवाडको तस्करी तीब्र
नेपालबाट कवाडको तस्करी पनि मौलाउँदै गएको छ । सशस्त्र प्रहरीकै अगाडीबाट जमुनाह भन्सार र पचपोखरा नाका हुँदै दिनदहाडै कवाडको तस्करी हुने गरेको स्थानीय बताउँछन् । कवाडीको तस्कर मुन्ना जसगढले विभिन्न नाकाबाट दिनदहाडै कवाड तस्करी गर्दा समेत नेपाल प्रहरी र सशस्त्र प्रहरी मुकदर्शक भएर बसेको स्थानीय बताउँछन् ।
तस्करहरुले नेपाल प्रहरी र सशस्त्र प्रहरीलाई लाइन दिएर कवाड निकासीमा सहयोगी बनेका छन् । सशस्त्र प्रहरी बलका डिएसपी अस्मिन थापा र तस्कर मुन्नाबीच घनिष्ट सम्वन्ध रहेको सशस्त्र प्रहरीकै तल्लो तहका कर्मचारीहरु बताउँछन् । नेपाल–भारत सीमा अन्तरगत बाँकेको खडैचा, हिरमिनीया कालाबन्जार, जमुनाह, जयसपुर, इच्छाराम बाबा मन्दिर पछाडीको भाग, पचपोखरा, साईगाउँ, बढैया, सैनिक लगायतका सहायक नाका चोरी तस्करीका लागि प्रमुख सहायक नाका मानिन्छन् । यी ठाउँमा विओपीसँगै पाँच सय मिटरको दूरीमा सशस्त्र प्रहरीले ड्यूटी दिन्छन् ।
Discussion about this post