बाँके चैत २६ गते ।
नेपालगन्जको रामलीला मैदाननजिक रहेको बाल मन्दिरको अत्याधुनिक भवन निर्माण सुरु भएको छ । नेपाल बाल सङ्गठन बाँकेका सभापति दत्तप्रसाद आचार्यका अनुसार ६ करोडको लागतमा तयार हुनेगरी छात्रावाससहितको विद्यालय निर्माण कार्य सुरु भएको हो ।
६ करोड रुपियाँमा तीन तल्ले अत्याधुनिक भवन निर्माण गरिने भए पनि पहिलो चरणमा एक करोड ४५ लाख रुपियाँको लागतमा पहिलो तल्ला भवन निर्माण कार्य अघि बढेको हो । पहिलो तलाको निर्माण कार्य असारभित्र सम्पन्न गर्नेगरी हाल निर्माण कार्य भइरहेको छ । हाल बाल मन्दिरको भवन जीर्ण तथा साँघुरो रहेका कारण अध्ययन अध्यापनमा असहज भएपछि नयाँ भवन निर्माण थालिएको छ ।
नेपाल बाल सङ्गठन बाँकेका सभापति आचार्यले भने, ‘डीपिआरअनुसार तीन तल्ले भवन निर्माण गरिनेछ, पहिलो तलामा विद्यालय, दोस्रोमा छात्रावास र तेस्रो तलामा विद्यालयको पठन पाठन हुने बताइएको छ । बाल मन्दिरमा हाल दुई सय जना विद्यार्थी अध्ययनरत छन् । आचार्यले दुई वर्ष अघिसम्म ४० जना विद्यार्थी रहेकोमा अहिले विद्यार्थीको सङ्ख्यामा वृद्धि भएको बताए ।
भौतिक निर्माणसहित शैक्षिक गुणस्तर सुधारका लागि समेत पहल थालिएको उनले बताए । बाल मन्दिरमा रहेको सभा हल जीर्ण रहेको छ । कोभिड सङ्क्रमणको समयमा सामान्य मर्मतसम्भार गरी आइसोलेसन केन्द्र सञ्चालन गरिएको छ ।
Discussion about this post