बाँके जेठ १५ गते ।
नेपाल–भारत खुल्ला सिमानाको फाइदा उठाउँदै तस्करहरुले अवैधरुपमा मालसामान भित्र्याइरहेका छन् । तस्करहरुलाई अवैधरुपमा सामान ल्याउन र लैजान चोरी निकासी नियन्त्रणका लागि नाकामा खटिएका सशस्त्र प्रहरीले सहयोग गरिरहेका छन् ।
नेपालगन्जको मुख्य नाका जमुनाहमा कडाई गरेको देखाएर सशस्त्र प्रहरीका विओपी इन्चार्जहरुले तस्करहरुसँग मोटो रकम लिएर सघाएको अनलाइन खोजखवरसँग प्रमाण सुरक्षित छ । अहिले सवैभन्दा धेरै तस्करी एकीकृत जाँच चौकी (आइसिपी) नजिक रहेको इच्छाराम बाबा बन्दिर नजिको चोर बाटोबाट भइरहेको छ ।
नेपालगन्ज भन्सार विओपीमा कार्यरत सशस्त्र प्रहरी डिएसपी अश्विन थापाको कमाण्डमा खटिएको सशस्त्र प्रहरीले उक्त ठाउँमा ड्यूटी गर्दै आएका छन् । तर, उक्त चोर बाटोमा खटिएका सशस्त्र प्रहरीले तस्करको सामान देखेर पनि नदेखे झैँ गरि आउजाउ गर्न दिने गरेको प्रत्यक्षदर्शी बताउँछन् ।
सशस्त्र प्रहरीको मिलोमतोमा नेपालगन्ज भित्रिएका अवैध सामान नेपालगन्ज बजारबाट नेपाल प्रहरीले दिनदिनै बरामद गरिरहेको छ । यसले नाकामा खटिएका सशस्त्र प्रहरीले तस्करबाट मोटो रकम लिएर अवैध सामान भित्र्याउन सहयोग गरिरहेको छ भन्ने प्रमाणित भएको छ ।
नाका छलेर भन्सार राजस्व नतिरी नेपालगन्ज पु¥याइएका लाखौं मूल्यका अवैध सामान नेपाल प्रहरीले दैनिकजसो बरामद गरे पनि चोरीपैठारी नियन्त्रणको जिम्मा लिएर सशस्त्र प्रहरी बल, बागेश्वरी गण महेन्द्रनगरमा आएका सशस्त्र प्रहरीका एसपी विमल डाँगीले चासो नदिएको सर्वसाधारण बताउँछन् । तस्करीको समाचार दिनदिनै आए पनि एसपी डाँगी चुप बस्नुले तस्करीमा उनको पनि हात भएको आशंका गरिएको छ । ‘तस्करी भइरहेको सूचना दिँदासमेत एसपी डाँगी चुप बस्नुले कुनै कुनै रहस्य छ,’ एक स्थानीयले अनलाइन खोजखवरलाई भने ।
पछिल्लो एक सातामा नेपाल प्रहरीले ४० लाख रुपैयाँ बराबरको अवैध सामान नियन्त्रणमा लिएर आवश्यक कारवाहीका लागि नेपालगन्ज भन्सार कार्यालयमा बुझाएको छ । बरामद सामान सशस्त्र प्रहरीको सहयोगमा मुख्य नाका र सहायक नाकाबाट भित्रिएका हुन् । नाकाबाट भित्रिएर अवैध सामानलाई तस्करहरुले नेपालगन्ज पुर्याएपछि नेपाल प्रहरीले १६ लाख रुपैयाँको अवैध सामान र २३ लाख रुपैयाँको मोबाइल डिस्प्ले बरामद गरेको छ । उक्त डिस्प्लेको बजार मुल्य २३ लाख सात हजार पाँच सय रहेको प्रहरीले जनाएको छ ।
बाँके प्रहरीले भारतबाट अवैध रुपमा ल्याइएका ७७ थान एन्ड्रोइड मोबाइल समेत नेपालगन्जको एक पसलबाट बरामद गरेको छ । नेपालगन्ज उपमहानगरपालिका २, सेतु बिक चोकस्थित एक पसलबाट उक्त मोवाइल बरामद गरेको बाँकेका प्रहरी प्रवक्ता डिएसपी नारायण डाँगीले जानकारी दिए ।
यसैगरी, बाँके प्रहरीले दुई लाख भन्दा बढीको लत्ताकपडा र डेढ क्विन्टल ब्रोइलर कुखुराको मासु र भन्सार छलेर नेपालगन्ज ल्याइएको २७ पिस कुर्ता सुरुवाल नेपालग्रन्ज–१ धम्बोझीबाट बरामद गरेको उनले बताए ।
बाँकेमा नेपाल–भारतको ६५ किलो मिटरमा दर्जनभन्दा बढी सशस्त प्रहरीको बिओपी छन् । उक्त बिओपीले प्रत्येक पाँच सय मिटर दूरीमा सहायक पोष्ट राखेर ड्यूटी गर्दै आएका छन् । सशस्त्र प्रहरीले आम सर्वसाधारणलाई देखाउनका लागि मात्र ड्यूटी गर्दै आएका छन् ।
नाकामा खटिने सशस्त्र प्रहरीले चोरी निकासी रोक्न नभई तस्करलाई सहयोग गर्न खटिएको जस्तो लाग्छ,’ एक प्रत्यक्षदर्शीले भने, ड्यूटीमा रहेका सशस्त्र प्रहरीले सर्वसाधारणलाई केरकार पार्छन् । तस्करको सामान खुलेआम आउन दिन्छन् । उनीहरु तस्करको सहयोगीको रुपमा काम गरिरहेका छन् ।’
सशस्त्र प्रहरीका विओपी इन्चार्जले तस्करहरुबाट रकम असुलेर एसपी विमल डाँगीलाई बुझाउने गरेको खुलासा भएको छ । विओपी इन्चार्जहरुले एसपी डाँगीलाई महिनावारी रुपमा रकम बुझाउने गरेको सशस्त्र प्रहरीको अधिकृत स्तरका एक कर्मचारीले भने ।
Discussion about this post