बाँके जेठ १६ गते ।
बाँकेको जानकी गाउँपालिका वडा नम्वर २ स्थित फुलपुरवाको विपन्न बस्तीमा जानकी गाउँपालिका बाँके, मिलाप संस्था र स्थानीय समुदायको लागत साझेदारीमा करिब १ दर्जन शौचालय निर्माण गरिएको छ। शौचालय निर्माणले गर्मीको समयमा हुने विभिन्न संक्रामक रोग नियन्त्रणमा सहयोग पुग्ने अपेक्षा गरिएको छ ।
उक्त बस्तीमा शौचालय निर्माणका लागि कुल ३ लाख ४ हजार ७ सय ४ रुपैयाँ लागत लागेको हो । जसमध्ये गाउँपालिकाको अनुदान रकम १ लाख ५० हजार ७ सय ४, मिलाप संस्थाको १ लाख १० हजार र स्थानीय समुदायको ४४ हजार लगानीमा शौचालय निर्माण भएका छन् । पक्की शौचालय निर्माणले गाउँमा ६५ जना लाभान्वित भएका छन् ।
मधेशी समुदायको बाहुल्यता रहेको उक्त गाउँमा प्रायः सबै घरहरुमा शौचालय थिएनन्, जसका कारण गर्मी समयमा विभिन्न संक्रमणको जोखिम निम्तिने खतरा थियो ।अझ वर्षायाममा खुलारुपमा दिसापिसाब गर्दा संक्रामक रोगका साथै सर्पको टोकाईको जोखिम थियो । विपन्न समुदायको बस्ती रहेका कारण शौचालयको समस्याको समाधान गर्नका लागि जानकी गाउँपालिकाले शौचालय निर्माणको अभियान शुरु गरेको गाउँपालिका अध्यक्ष छब्बन खाँले बताए ।
शौचालय नभएको कारण खेतबारीमा जानुपर्ने, बालबालिका र महिला पनि जोखिममा भएको कारणले गर्दा शौचालयको आवश्यकता देखिएपछि उनीहरुको आर्थिक अवस्था समेत कमजोर भएकोले गाउँपालिका र मिलाप संस्थाले ११ घरधुरीमा शौचालय निर्माण गरिदिएको मिलाप सस्थाकी प्रेमा रोकाले बताइन् । शौचालय पनि नभएको एैलानी जमिनमा माटोको घरमा बस्नुपर्ने, आफूहरु गरिब र कुनै रोजगारी पनि नभएकाले समस्या भएको स्थानीयहरु बताउँछन् ।
“खेतवारीमा वर्षातमा रातको समयमा समेत शौचालय जानुपर्ने वाध्यता थियो, जसले गर्दा सर्प लगायतको डर त छँदै थियो, असुरक्षित ििपन थियौं, अब सजिलो हुनेछ,“ जानकी गाउँपालिका–२ की रितु कहार भन्छिन् । जानकी २ कै पिन्टु कहारले पनि खुसी ब्यक्त गरिन् । शौचालयको अभावमा स्थानीयहरु रातको समयमा खेतबारीमा जानुपर्ने हुँदा बालवालिका तथा महिलाहरु बढी जोखिममा थिए ।
Discussion about this post