बाँके जेठ २७ गते ।
गृहमन्त्री रवि लामिछाने र प्रहरी प्रधान कार्यालयको निर्देशन विपरित बाँकेमा सादा पोशाकमा घुमुवा प्रहरी परिचालन गरिएको छ । अपराध अनुसन्धानका लागि भन्दै बाँके प्रहरीले परिचालन गरेका घुमुवा प्रहरीहरु असुली धन्दामा लागेका छन् । यी घुमुवा प्रहरीहरुका कारण बाँकेमा तस्करी मौलाएको छ । घर खर्चका लागि ल्याउँदै गरेका सर्वसाधारणको सामान खोसेर यी घुमुवा प्रहरीले बाँके प्रहरी प्रमुख एसपी तुलबहादुर कार्कीलाई तस्करीको सामान बरामद गरेको भन्दै झुक्याउने गरेको खुलासा भएको छ ।
थोरै थोरै सामान खोसेर राख्ने र एककठा पारेर जिल्ला प्रहरी कार्यालय बाँकेका प्रहरी प्रमुखलाई बुझाउने गरेको स्रोत बताउँछ । बाँके प्रहरी प्रमुख कार्कीले अरबी खाँ लगायत बाँकेमा भएका ठूला घटनाको अनुसन्धान गर्न परिचालन गरे पनि ति घुमुवा प्रहरीहरु नाकामा जाने र घर खर्चका लागि सर्वसाधारणले ल्याउँदै गरेको सामान खोसेर राख्ने गरेको खुलेको छ ।
ठूला तस्करहरुसँग लाइन लिएर उनीहरुले सर्वसाधारणलाई सास्ती दिँदै आएपछि जनगुनासो बढेको छ । ‘अपराध अनुसन्धानका लागि भनि खटाइएका घुमुवा प्रहरी असुली धन्दामा लागेको देख्दा अचम्म लागेको छ,’ एक प्रत्यक्षदर्शीले भने ।
प्रहरी प्रधान कार्यालयले सादा पोशाकमा घुमुवा प्रहरी नराख्न सात वटै प्रदेशका प्रहरी प्रमुखलाई निर्देशन दिए लगतै लुम्विनी प्रदेश प्रहरीले बाँके प्रहरीलाई घुमुवा प्रहरी नराख्न र राख्नै परे सोको कारण खुलाउन र घुमुवा प्रहरीको नाम एक घण्टामा पठाउन निर्देशन समेत दिएको थियो । तर, बाँके प्रहरीले गृहमन्त्री, आइजिपी र प्रदेश प्रहरी प्रमुखको निर्देशनलाई लत्याउँदै घुमुवा प्रहरी परिचालन गरेको छ । अनुसनधानका लागि परिचालन गरिएका घुमुवा प्रहरीले आफ्नो दायित्व विर्सेर अशुली धन्दामा लागेका छन् । यी घुमुवा प्रहरी यसअघि पनि परिचालन भएका थिए । ‘पहिलेदेखि कमाउ धन्दामा लागेकाहरुलाई फेरि परिचालन गर्दा बाँके प्रहरीको बदनाम भइरहेको छ । अनुसन्धानभन्दा घुमुवा प्रहरीहरु नाकामा बसेको देखिन्छ,’ स्थानीयले भने, ‘घुमुवा प्रहरीको काम अशुली धन्दा भएको छ । यसले सर्वसाधारणलाई सास्ती भएको छ नै बाँके प्रहरी प्रमुखको बदनामसमेत भएको छ ।’
दैनिक खर्चका लागि सामान ल्याउनेलाई तर्साउने, सामान खोस्ने र अपशब्द प्रयोग गरि होच्याउने, गिज्याउन समेत यी घुमुवा प्रहरीको दैनिकी बनेको छ । ‘आफ्नो हाकिमलाई खुसी बनाउन साइकलमा ल्याउँदै गरेको सामान खोस्ने र भण्डारण गरि बुझाउने काम बाहेक अरु केहि भएको छैन,’ स्रोतले भन्यो । घुमुवा प्रहरीले सामान हेरेर ५ देखि १० हजार रुपैयाँसम्म लिएर तस्करको सामान छाड्ने गरेका छन् । ‘ती घुमुवा प्रहरीले ठूला तस्करहरुबाट मोटो रकम लिएर छाड्ने र सानालाई सास्ती दिइरहेका छन्,’ एक पीडितले भने ।
बाँके प्रहरीले नेपालगन्ज उपमहानगरपालिका २१ बिर्ताका अरबी खाँ हत्या घटनाको अनुसन्धान गर्न प्रहरी हवल्दार अतिस खान, प्रहरी सहायक हवल्दार राम सुमन चौधरी, प्रहरी सहायक हवल्दार गंगाराम मल्ल, प्रहरी जवान बिनोद केसी र प्रहरी जवान वीरबहादुर ताउलेलाई परिचालन गरेको थियो । योे प्रहरी टोली अनुसन्धानका लागि बिर्तामा कहिले काँहीमात्र पुग्ने गरेको पीडित परिवारका सदस्य बताउँछन् । ‘अनुसन्धानका लागि खटिएको प्रहरी टोली हत्या घटनाको अनुसन्धानभन्दा नाकामा पुगेर तस्करसँग मोटो रकम असुल्न ब्यस्त छ,’ परिवारका एक सदस्यले भने, ‘अनुसन्धानमा खटिएको प्रहरीको लापरबाहीले अहिलेसम्म हत्यामा संलग्न फेला पर्न नसकेको हाम्रो ठम्याई छ ।’
अनुुसन्धान टोलीको नाइके अतिस खानले आफू मातहतका प्रहरीलाई नाकामा पठाउने र तस्करबाट रकम असुल्ने काममा लगाउने गरेको स्रोत बताउँछ । खान आफूसँगै रहेका प्रहरीलाई बिर्ताभन्दा नाकामा जान निर्देशन दिने गरेको खुल्नमा आएको छ ।
Discussion about this post