बाँके असार १७ गते ।
बाँके प्रहरीले भन्सार छलेर भण्डारण गरी राखेको ठूलो परिमाणको अवैध कपडा बरामद गरेको छ ।
नेपालगन्ज उपमहानगरपालिका–२ घरबारी टोल न्यूरोडस्थित भानुभक्त चोक नजिक सोनी गुप्ताको घरबाट ३८ लाख ३९ हजार दुई सय रुपैयाँ मूल्य पर्ने अवैध लत्ताकपडा बरामद गरेको बाँकेका प्रहरी प्रवक्ता डिएसपी नारायण डाँगीले जानकारी दिए ।
जिल्ला प्रहरी कार्यालय र वडा प्रहरी कार्यालयबाट खटिएको प्रहरी टोलीले गुप्ताको घरमा छापा मार्दा भारतबाट अवैध रुपमा ल्याएर भण्डारण गरेका विभिन्न थरिका अवैध लत्ताकपडा बरामद भएको उनले बताए । उनका अनुसार, प्रहरीले ३४ लाख १९ हजार दुई सय रुपैयाँ पर्ने ४ हजार दुई सय ७४ जोर कुर्ता सुरुवाल र ४ लाख २० हजार रुपैयाँ बराबरको आठ सय ४० थान साडी बरामद गरेको छ ।
बरामद गरिएको सामान र गुप्तालाई थप कारवाहीका लागि नेपालगन्ज भन्सार कार्यालयमा बुझाइएको बाँके प्रहरीले जनाएको छ । अवैध सामान ओसार पसारमा संलग्नलाई कारवाहीको दायरामा ल्याउन जिल्ला प्रहरी कार्यालयले सक्रियता देखाएपछि तस्करहरु त्रसित भएका छन् ।
Discussion about this post