बुटवल माघ १० गते ।
लुम्बिनी प्रदेश सभाले आर्थिक कार्यविधि तथा वित्तीय उत्तरदायित्व सम्बन्धमा व्यवस्था गर्न बनेको विधेयकलाई दफावार छलफलका लागि अर्थ, उद्योग तथा पर्यटन समितिमा पठाएको छ। बुधवार सम्पन्न लुम्बिनी प्रदेश सभाको पाँचौं अधिवेसनको छैठौं बैठकमा आर्थिक मामिला तथा योजना मन्त्री धनेन्द्र कार्कीले उक्त विधेयक सम्बन्धित समितिमा पठाइयोस् भन्ने प्रस्ताव प्रस्तुत गरेका थिए।
सभाले विधेयकलाई दफावार छलफलकालागि समितिमा पठाइयोस भन्ने प्रस्ताव पारित गरेको सभामुख तुलाराम घर्तीमगरले जानकारी गराएका छन्। सभामा मुख्यमन्त्री चेतनारायण आचार्यको तर्फबाट शहरी विकास तथा खानेपानी मन्त्री सरोज थापाले थारु आयोगको पाँचौं र छैठौं वार्षिक प्रतिवेदन, मधेशी आयोगको चौथो वार्षिक प्रतिवेदन र आदिवासी जनजाति आयोगको चौथो वार्षिक प्रतिवेदनहरु सभामा पेश गरेका छन्।
बैठकमा सामाजिक विकास मन्त्री जन्मजय तिमिल्सिनाले सभामा उठेका सवालहरुको जवाफ दिएका थिए। उनले सामाजिक विकास मन्त्रालयमा गाभिएको महिला, बालबालिका तथा ज्येष्ठ नागरिक मन्त्रालयको अख्तियारी एक हप्ता भित्र कार्यान्वयनाम आउने जानकारी दिए। महिला परिषद् गठनको बारेमा पनि कानूनी आधार निर्माण गरेर अघि बढाउने बारेमा धारणा राखेका थिए। प्रदेशसभा सदस्यले समसामायिक विषयमा विशेष समयमा बोल्दै विभिन्न सामाजिक, राजतिनिकत तथा आर्थिक बिषयहरुमा सरकारको ध्यानाकर्षण गराएका छन्।
Discussion about this post