बाँके असार १८ गते ।
बाँकेको राप्तीसोनारी–९, ढकेरीस्थित झिझरी महिला सामुदायिक वनमा एकै दिन आठ हजारभन्दा बढी बिरुवा रोपिएका छन् । विभिन्न प्रजातिका आठ हजारभन्दा बढी बिरुवा रोपिएको डिभिजन वन कार्यालय बाँकेले जनाएको छ ।
डिभिजन वन कार्यालय बाँकेका प्रमुख शङ्करप्रसाद गुप्ताले डिभिजन वन कार्यालय बाँकेको आयोजनामा भएको सो वृक्षरोपण कार्यक्रममा ६.३६ हेक्टरमा वृक्षरोपण गरिएको बताए । उनले वृक्षरोपण क्षेत्रको परिधि एक हजार १३८ मिटर रहेको जनाउँदै सो क्षेत्रफलमा आठ हजार बिरुवा वृक्षरोपण गरिएको बताए ।
रोपिएका बिरुवामा खयर, सिसौ वीरेन्द्र फल, सतिसाल, अर्जन श्रीखण्ड (सेतो चन्दन) गोल्डमोहरलगायत रहेका छन् । जलवायु परिवर्तनले महिला, विपन्न, आदिवासीको कृषि, स्वास्थ्यमा नकारात्मक असर परिरहेको उल्लेख गर्दै त्यसलाई कम गर्न पनि वृक्षरोपण जरुरी रहेको उनले बताए । त्यस अवसरमा सामुदायिक वन उपभोक्ता समूहका सदस्य, वातावरण अभियन्ता र अन्य स्थानीयले सामूहिक रूपमा वृक्षरोपण गरेका थिए ।
Discussion about this post