बाँके मंसिर ९ गते ।
पश्चिम नेपालका प्रमुख नाकाहरुमध्येको एक नेपालगञ्ज नाकाबाट गत चार महिनाको अवधिमा २४ अर्बभन्दा बढीको व्यापार भएको छ ।
नेपालगञ्ज भन्सार कार्यालयले दिएको जानकारी अनुसार चालु आर्थिक वर्ष २०८२–०८३ को चार महिनामा यो नाकाबाट २३ अर्ब ८० करोड ३५ लाख २६ हजारको आयात र ७७ करोड २८ लाख ४६ हजारको निर्यात गरेर २४ अर्ब ५७ करोड ६३ लाख ७२ हजार रुपैयाँको व्यापार भएको हो ।
नेपालगञ्ज भन्सार कार्यालयका प्रमुख जनार्दन पौडेलले गत आर्थिक वर्षको तुलनामा चालु आवको चार महनिामा यो नाकाबाट करिब दुई अर्बभन्दा बढी कारोबार वृद्धि भएको बताए । उनले गत आर्थिक वर्ष २०८१–०८२ मा यो नाकाबाट २१ अर्ब ९७ करोड ३० हजार रुपैयाँको आयात र ६६ करोड २७ लाख ६७ हजारको निर्यात गरेर २२ अर्ब ६३ करोड २७ लाख ९७ हजारको व्यापार भएको बताए ।
गत आवको तुलनामा यो नाकाबाट कारोबार वृद्धि भए पनि राजस्व सङ्कलन भने पाँच करोड रुपैयाँ घटेको नेपालगञ्ज भन्सार कार्यालयले जनाएको छ ।
सो कार्यालयका अनुसार चालु आर्थिक वर्ष २०८२–८३ को सुरुको चार महिनामा छ अर्ब एक करोड ३४ लाख ८० हजार रुपैयाँ भन्सार राजस्व सङ्कलन भएको छ भने गत आर्थिक वर्ष २०८१–०८२ को चार महिनामा छ अर्ब सात करोड ५६ लाख ३० हजार रुपैयाँ राजस्व सङ्कलन भएको थियो ।
भदौ महिनामा भएको जेनजी आन्दोलनका कारण केही दिन राजस्व सङ्कलन प्रभावित भएकोले पनि गत आवको भन्दा चालु आवमा अलिकति राजस्व घटेको हुनसक्ने नेपालगञ्ज भन्सार कार्यालयले जनाएको छ ।
सो कार्यालयका अनुसार गत आर्थिक वर्षको साउनमा एक अर्ब ५० करोड ३८ लाख ३४ हजार राजस्व सङ्कलन भएकोमा चालु आवको साउन महिनामा एक अर्ब ३८ करोड ३७ लाख ८४ हजार रूपैयाँ, गत आवको भदौमा एक अर्ब ४९ करोड ५ लाख २० हजार राजस्व सङ्कलन भएकोमा चालु आवको भदौ महिनामा एक अर्ब ३५ करोड १० लाख नौ हजार राजस्व सङ्कलन भएको छ ।
त्यस्तै, गत आवको असोज महिनामा एक अर्ब ४१ करोड २९ लाख ४२ हजार राजस्व सङ्कलन भएकोमा यस बर्ष ह्वात्तै वृद्धि भई एक अर्ब ७४ करोड १६ लाख पाँच हजार रूपैयाँ राजस्व सङ्कलन भएको छ । यस्तै गत आवको कात्तिक महिनामा एक अर्ब ६६ करोड ८३ लाख ७ हजार राजस्व सङ्कलन भएकोमा चालु आवको कात्तिक महिनामा एक अर्ब ५३ करोड ७० लाख ८२ हजार रुपैयाँ राजस्व सङ्कलन भएको छ ।
Discussion about this post