बाँके फागुन ९ गते।
सशस्त्र प्रहरी बल, नेपालले बाँके जिल्लाबाट अवैध सामान बोकेको एक बोलेरो गाडी नियन्त्रणमा लिएको छ। सशस्त्र प्रहरी बलको कुण्डा बेसबाट खटिएको मोबाइल टोलीले बाँकेको राप्तीसोनारी गाउँपालिका–६, कुण्डा क्षेत्रमा नियमित चेकजाँचका क्रममा उक्त गाडीलाई नियन्त्रणमा लिएको हो।
नेपालगञ्जबाट दाङतर्फ जाँदै गरेको भे १ च ३८६० नम्बरको बोलेरो गाडी जाँच गर्ने क्रममा भाँडावर्तनसहित विभिन्न सामग्री फेला परेको प्रहरीले जनाएको छ। उक्त सामग्रीका बिल–बिजकमा शंका उत्पन्न भएपछि गाडी, सामान तथा गाडीमा सवार व्यक्तिहरूलाई नियन्त्रणमा लिइएको सशस्त्र प्रहरीले जानकारी दिएको छ।
नियन्त्रणमा लिइएका व्यक्तिहरूमा सामान धनी भारतको उत्तर प्रदेश राज्य अन्तर्गत बहराइच जिल्लाका ३० वर्षीय अब्दुल कदीर र गाडी चालक सुर्खेत जिल्ला भेरीगंगा नगरपालिका–८ निवासी २५ वर्षीय दीपक खत्री रहेका छन्।
नियन्त्रणमा लिइएको गाडी, सामान तथा दुवै व्यक्तिलाई थप अनुसन्धान तथा आवश्यक कारबाहीका लागि राजश्व अनुसन्धान कार्यालय, कोहलपुरमा बुझाइएको सशस्त्र प्रहरीले जनाएको छ। घटनाबारे थप अनुसन्धान भइरहेको प्रहरीले जनाएको छ।
Discussion about this post