बाँके चैत २१ गते ।
भूमि सुधार तथा मालपोत कार्यालय, बाँकेले सेवाग्राहीका लागि कार्यालय प्रवेशसम्बन्धी नयाँ व्यवस्था लागू गरेको छ। सेवा प्रवाहलाई प्रभावकारी, पारदर्शी र गुणस्तरीय बनाउन अबदेखि परिचय खुल्ने कागजात हेरेपछि मात्र सेवाग्राहीलाई कार्यालय प्रवेश दिइने कार्यालयले जनाएको छ।
कार्यालयद्वारा जारी सूचनाअनुसार अनधिकृत व्यक्ति तथा बिचौलियाको प्रवेश रोक्न उक्त व्यवस्था लागू गरिएको हो। सेवा लिन आउने सेवाग्राही, कानुन व्यवसायी तथा लेखापढी व्यवसायीले अनिवार्य रूपमा परिचयपत्र साथमा ल्याउनुपर्नेछ।
त्यस्तै, अन्य व्यक्तिले पनि कार्यालय प्रवेशद्वारमै परिचय खुल्ने कागजात देखाएपछि मात्र प्रवेश पाउने व्यवस्था गरिएको छ। आधिकारिक व्यक्तिबाहेक अन्य कसैले विभिन्न शाखा वा फाँटमा प्रवेश गरी कामकाजमा बाधा नपु¥याउन कार्यालयले आग्रह गरेको छ।
प्रमुख मालपोत अधिकृत सविनसिंह चौधरीद्वारा जारी सूचनामा सेवा प्रवाहलाई सहज र व्यवस्थित बनाउन सबै सेवाग्राहीलाई नियमको पालना गर्न अनुरोध गरिएको छ।
चौधरीका अनुसार ‘जेनजी’ आन्दोलनपछि सर्वसाधारणको चाप एक्कासि बढ्दा कार्यालयभित्र अव्यवस्था सिर्जना भएको थियो। “अनावश्यक भीड नियन्त्रण गर्न र सुरक्षा कायम राख्न यस्तो निर्णय लिनुपरेको हो,” उनले बताए।
नयाँ व्यवस्था कार्यान्वयनमा आएपछि सेवा प्रवाह थप व्यवस्थित, सुरक्षित र प्रभावकारी बन्ने अपेक्षा गरिएको छ।
Discussion about this post